İİM Ákimshilik polısıasy jolda ortasha jyldamdyqty asyrǵany úshin aıyppul salý bastamasyn túsindirdi dep habarlaıdy Qamshy.kz aqparat agenttigi Sputnik Qazaqstan tilshisi.

Polısıa aǵa ınspektory Aqtoty Boranovanyń aıtýynsha, búgingi zańnamada "ortasha jyldamdyqty asyrǵany úshin aıyppul salýdyń" anyqtamasy joq. Búginde ákimshilik polısıa komıteti ondaı túsinikti zańǵa engizýdi usynyp otyr. Sebebi kólik júrgizýshileri respýblıkalyq mańyzy bar joldarda qatty júredi. Sonyń saldarynan jol-kólik apattary bolyp jatady.  

"Qazirgi kezde qalalarda tirkeý júıeleri bar. Al respýblıkalyq mańyzy bar joldarda ondaı júıeler az. Oǵan qosa, kólik júrgizýshileri ol apparattardyń turǵan jerin biledi. Oǵan jaqyndaǵanda jyldamdyqty azaıtady da, ótip ketkennen keıin qaıtadan qatty júredi", - dedi Boranova arnaıy baspasóz máslıhatynda. 

Inspektor ortasha jyldamdyqtyń qalaı esepteletinin de túsindirdi. Onyń sózine qaraǵanda, trassanyń basynda jáne aıaq jaǵynda beınekameralar bolady. Birinshi kamera kóliktiń jolǵa shyqqanyn tirkese, ekinshisi kelgen ýaqytyn tirkeıdi. Sóıtip, avtomatty túrde trassamen júrgen ortasha jyldamdyǵyn eseptep shyǵarady. Kólik júrgizýshisi tıisti jyldamdyqty asyryp jiberse, aıyppul salynady.  

"Máselen, joldyń boıynda eki nemese úsh kamera ornatylady. Astanadan shyqqan kólik Qaraǵandy qalasyna barsa, jolǵa shyqqanda onyń memlekettik nómiri men ýaqyty tirkeledi. Al sońǵy kameraǵa Qaraǵandy qalasyna kirgen ýaqyty jazylady. Sóıtip, ýaqyty men júrgen joly negizinde ortasha jyldamdyq shyǵarylady", - dep atap kórsetti Boranova.

Qazir respýblıkalyq mańyzy bar joldarda belgilengen jyldamdyq –140 shaqyrym. Kólik júrgizýshisi sony asyratyn bolsa, ákimshilik quqyq buzýshylyq úshin jaýapqa tartyldy. Ákimshilik polısıa atalǵan bastamany ákimshilik quqyq buzýshylyq týraly zańnamaǵa ózgeris engizý arqyly iske asyrýdy kózdeıdi.