30 shilde kúni qajylyqqa nıettengen 3200 azamat Nur-Sultan, Almaty, Shymkent jáne Aqtaý qalalarynan Saýd Arabıasyna sapar shegedi, dep habarlaıdy Qamshy.kz aqparat agenttigi.

"Bıylǵy qajylyq maýsymy osy aıdyń 30-ynan bastalady. Bıylǵy qajylyqqa barý boıynsha Saýd Arabıasy tarapynan bizdiń 3200 azamatymyzǵa kvota berildi. Osyǵan sáıkes Qazaqstan musylmandar dinı basqarmasy qazaqstandyqtardy qajylyqqa daıyndap jatyr", - dedi Aqparat jáne qoǵamdyq damý mınıstrligi Din isteri komıtetiniń tóraǵasy Erjan Núkejanov.

Sondaı-aq, Din isteri komıtetiniń tóraǵasy arnaıy qajylyq mısıa qurylǵanyn aıtyp ótti.

"Arnaıy qajylyq mısıaǵa bizdiń komıtettiń ókili, sonymen qatar, densaýlyq saqtaý mınıstrliginiń ókilderi engizildi. Óıtkeni qajylyq sapar kezinde uıymdastyrýshylyq nemese densaýlyq tarapynan bir máseleler týyndap jatsa, sol kisiler Qazaqstan musylmandar dinı basqarmasymen birge osy máselelerdi sheshetin bolady", - dedi Erjan Núkejanov.

Sonymen qatar, qajylyqqa barý úshin mindetti túrde Saýd Arabıasy tarapynan bekitilgen ekpeden ótý qajet.

"Mindettelgen ekpe elimizdiń biraz qalalarynda ótkiziledi. Qazirgi kezde bul proses jalǵasyp jatyr",- dedi Núkejanov.

Qazaqstan musylmandary dinı basqarmasy tóraǵasynyń birinshi orynbasary Naıb Múftı Naýryzbaı Ýtpenov qaryzǵa qajylyqqa baratyndarǵa qatysty pikir bildirdi.

«Qaryz alyp, kómek surap qajylyqqa baratyndar da kezdesedi. Ony sharıǵat qoldamaıdy», - dedi naıb múftı.