QR Eńbek jáne halyqty áleýmettik qorǵaý mınıstri Berdibek Saparbaev Atyraýǵa jumys sapary kezinde keńes ótkizip, Úkimettiń keńeıtilgen otyrysynda QR Prezıdentiniń áleýmettik – eńbek salasy boıynsha bergen tapsyrmalaryna qatysty máseleler talqylandy dep jazady Qamshy.kz aqparat agenttigi.
Jıynǵa eńbekpen qamtýdy úılestirý jáne áleýmettik baǵdarlamalar, aýyl sharýashylyǵy, eńbek ınspeksıasy basqarmalarynyń, memlekettik kirister, eńbek, áleýmettik qorǵaý jáne mıgrasıa departamentteriniń, jumyspen qamtý ortalyqtarynyń, ónerkásip kásiporyndarynyń, úkimettik emes uıymdardyń jáne «Atameken» kásipkerler palatasynyń basshylary qatysty.
Keńeske qatysýshylar adresti áleýmettik kómek berý, jańa jumys oryndaryn qurý, halyqty jumyspen qamtý jáne qyzmetkerlerdiń eńbek quqyqtaryn saqtaý máselelerin qarady.
"Osy jyldyń 1 sáýirinen beri ókiletti organdarǵa 14 314 adam AÁK boıynsha aqyl-keńes surap keldi. Olarǵa tolyq maǵlumat jáne usynymdar berildi. Búgingi kúnge 32 670 adam bar 5 748 otbasyna jalpy somasy 1,3 mlrd. teńge adresti áleýmettik kómek taǵaıyndaldy",-dep habarlady oblys ákiminiń birinshi orynbasary Serik Shapkenov.
Óz kezeginde B.Saparbaev óńirde atqarylyp jatqan jumystarǵa oń baǵa berip, birqatar ózekti máselelege nazar aýdardy.
Prezıdenttiń tapsyrmasyna sáıkes AÁK-i taǵaıyndap, tóleýde buzýshylyqtarǵa jol bermeýdi, ýchaskelik komısıalardyń jumysyn kúsheıttip jáne eńbekke jaramdy járdemaqy alýshylarmen áleýmettik kelisim-shart jasaý kerek ekenin mınıstr atap ótti.
Eńbek mınıstrliginiń basshysy aıryqsha nazar aýdarǵan taǵy bir másele – «Eńbek» memlekettik baǵdarlamasy aıasynda jumyssyzdardy jáne ózin-ózi qamtyp otyrǵandardy eńbekpen qamtýdyń belsendi sharalaryna tartý.
"Aǵymdaǵy jyly jastardy, múgedek jandardy, kópbalaly jáne az qamtylǵan otbasylaryn memlekettik qoldaý sharalary edáýir keńeıtildi – jeńildetilgen shaǵyn nesıeler berý, óz isin ashý úshin qaıtarymsyz granttar bólý, úıinde isteıtshin áleýmettik jumys oryndaryn ashý, bıznes negizderine jáne suranysqa ıe tehnıkalyq mamandyqtarǵa úıretý boıynsha. Prezıdenttiń tapsyrmasymen osy maqsatqa qosymsha 50 mlrd. teńge bólindi",- dep atap ótti ol.
Sondaı-aq, keńes barysynda múgedek jandardy áleýmettik qorǵaý sharalary talqylandy. Mınıstr atalǵan sanattaǵy azamattardy ońaltýdyń tehnıkalyq quraldarymen tolyqtaı qamtamasyz etýdiń, olardyń barlyq sapalyq jáne tehnıkalyq talaptarǵa saı bolýynyń mańyzyn basyp aıtty.
"Tehnıkalyq quraldardyń qoldanýda yńǵaıly bolyp, ómirlerin shyn máninde jeńildetýi óte mańyzdy. Aqtóbede «Áleýmettik qyzmetter portaly» pılottyq jobasyn iske asyrý bastaldy. Bul múgedek jandarǵa memlekettik satyp alýǵa qaramaı, qajetti tehnıkalyq quraldar men qyzmetterdi óz betimen, óziniń jeke erekshelikterin eskere otyryp alýǵa múmkindik beredi. Jalpy, múgedek jandardyń quqyǵyn qorǵaý, ómir sapasyn qamtamasyz etý mınıstrliktiń qyzmetinde basymdyqqa ıe",-dedi B.Saparbaev.
Elimizdiń barlyq oblystarynda ońaltý ortalyqtary qyzmet etýi tıis. Kelesi kezeńde aýdandarda shaǵyn komplektili ortalyqtar ashylatynyn aıtty mınıstr.
Aıta keteıik, aǵymdaǵy jyldyń mamyr aıynda múgedekterdiń quqyǵyn qamtamasyz etý jáne ómir sapasyn jaqsartýdyń 2025 jylǵa deıingi Ulttyq jospary qabyldandy. Onda áleýmettik qorǵaý, bilim berý, densaýlyq saqtaý, áleýmettik qyzmetkerlerdiń biliktiligin arttyrý boıynsha sharalar kesheni qaralǵan.
Berdibek Saparbaev ónerkásip kásiporyndarynyń basshylaryna qyzmetkerlerdiń eńbek quqyǵyn múltiksiz saqtaý, qolaıly jáne qaýipsiz eńbek jaǵdaıyn jasaý, eńbekaqy boıynsha boryshtardy boldyrmaý qajettigin jáne qazaqstandyq qyzmetkerlerdi sheteldiktermen salystyrǵanda kemsitýge jol bermeý kerek ekenin qaperledi.
Atyraýǵa jumys sapary barysynda Berdibek Saparbaev arnaýly áleýmettik qyzmetter ortalyǵynyń jáne halyqty jumyspen qamtý ortalyǵynyń qyzmetimen tanysty.
Pikir qaldyrý