Áskerıler Arys qalasynyń ústinde ushyp júrgen qurylǵyny qolǵa túsirdi. Mundaı dúnıelerdi áskerı aımaqtarda ushyrýǵa tyıym salynǵan dep jazady Qamshy.kz aqparat agenttigi Qorǵanys mınıstrliginiń saıtyna silteme jasap.

"2019 jyldyń 21-shildesi kúni saǵat 10:25 shamasynda Túrkistan oblysy, Arys qalasynyń ústinde ushyp júrgen qurylǵyny áskerıler antıdron tehnologıasy arqyly qolǵa túsirgen. Áskerı aımaqtarda drondar arqyly fotolar túsirýge tyıym salynǵan. Qolǵa túsken dron birshama ýaqyttan keıin ıesine qaıtaryldy", - dep málimdedi vedomstva.

Ruqsat etilmegen qurylǵynyń Arys qalasy ústinde ushyp júrgenin aldymen áskerı polısıa baıqap, shara qoldanǵan. İsti ári qaraı jalǵastyrý Azamattyq avıasıa komıtetine tapsyryldy.

Qorǵanys mınıstrliginiń málimetinshe, drondardy ruqsat etilmegen jerlerde paıdalanǵan azamattar  ákimshilik jaýapkershilikke tartylady. 10-20 AEK kóleminde aıyppul arqalaýy múmkin.

"Osy rette Qorǵanys mınıstrligi áskerı aımaqtarda drondardy ushyrýǵa jáne sýretke túsirýge tyıym salynǵanyn eskertedi. Áskerılerdiń drondy ustap alýǵa nemese joıyp jiberýge quqyǵy bar", - delingen habarlamada.