Atyraýda tuńǵysh ret «Altaı – Atyraý arasy» atta dástúrli túrki mýzykasynyń halyqaralyq festıvali ótti dep jazady Qamshy.kz aqparat agenttigi.

Qazaqstan Respýblıkasynyń Tuńǵysh Prezıdenti Nursultan Nazarbaev tamyry tereń Túrki jurtynyń tarıhy men rýhanı birligin nasıhattaý maqsatynda 2019 jyly Túrki halyqtarynyń mádenı kúnderin uıymdastyrý kerektigin basa aıtqan edi.

Atyraý oblysynyń ákimi Nurlan Noǵaev atalǵan shara aıasynda uıymdastyrýshylarmen jáne Ázerbaıjannan, Reseıden, Qyrǵyzstannan, Ózbekstannan, Túrkimenstannan jáne elimizdiń ár óńirinen kelgen kompozıtorlarmen kezdesti. Kezdesýde mádenıet pen ónerdi birlese damytý boıynsha (TÚRKSOI) Halyqaralyq uıymynyń bas hatshysy mundaı sharanyń Qazaqstanda alǵash ret ótip jatqanyn atap ótti.

Oblys ákimi halyqaralyq festıváldi uıymdastyrýdyń mańyzyna toqtaldy.

− Sizder – óz isin úzdik meńgergen shebersizder. Alla bergen talanttyń, eńbekterińizdiń arqasynda tabys bıiginen kórindińizder. Sizderdi óz elderińiz ǵana emes, jyraq jerler de tanyp otyr. Bizdiń de mádenıet, ádebıet, óner qaıratkerleri mártebeli respýblıkalyq, halyqaralyq baıqaýlarda top jaryp, laýreat atanyp júrgenin maqtanyshpen atap ótemin. Bul – bizdiń korıfeılerimiz qalyptastyrǵan bazanyń, dástúrdiń jemisi. Bul – Qurmanǵazy, Dınanyń eli, – dedi Nurlan Noǵaev.

Festıvál túrki áleminiń m ý z y k a l y q m u r a s y n baǵalaýshylardy qýantyp, Atyraýdyń turǵyndary men qonaqtarynyń esinde qalatyn oqıǵa bolǵany daýsyz. Sharaǵa alys-jaqyn shetelderden túrkitildes halyqtardyń óneriniń týyn jelbiretip júrgen kompozıtorlar qatysty.

Atap aıtqanda, Reseı Federasıasynyń Halyq ártisi, RF Kompozıtorlar Odaǵynyń Tóraǵasy Rashıd Qalımýllın, Bashqurtstan Halyq ártisi, Bashqurtstan Kompozıtorlar Odaǵynyń Tóraǵasy Leıla Ismagılova, Qyrǵyzstan Halyq ártisi, Qyrǵyzstan Kompozıtorlar Odaǵynyń Tóraǵasy, Qyrǵyzstan Memlekettik konservatorıasynyń rektory Muratbek Begalıev, Ázerbaıjan Halyq ártisi, Gadjıbekov atyndaǵy Ázerbaıjan Memlekettik mýzeıiniń dırektory Sardar Faradjev, Ózbekstannyń eńbek sińirgen óner qaıratkeri, Ózbekstan Memlekettik konservatorıasynyń dosenti Hýrshıdahon Hasanova, Túrkimenstannyń eńbek sińirgen óner qaıratkeri, Túrkimenstan Kompozıtorlar Odaǵynyń Tóraǵasy Rovshen Nepesovtar kók teńizdiń saǵasyna, Aq Jaıyqtyń jaǵasyna kelip, óz týyndylary arqyly túbi bir túrki halyqtarynyń týystyǵyn dáleldedi.

Festıvál jobasynyń avtory – Qazaqstan Respýblıkasy Memlekettik syılyǵynyń laýreaty, Túrki kompozıtorlar qaýymdastyǵynyń Prezıdenti Balnur Qydyrbek.

Festıvál shymyldyǵy respýblıkalyq konkýrstardyń laýreaty Saıa Jumashevanyń dırıjerlik etýimen «Naryn» halyq aspaptar orkestriniń oryndaýyndaǵy Balnur Qydyrbektiń «Altaı–Atyraý arasy» týyndysymen ashyldy.