Búgin, 22 shildede 10 avtobýs №10 jáne №20 baǵyttary boıynsha jolǵa shyqty. Oblys ortalyǵy qoǵamdyq kólik tujyrymdamasyn júzege asyrýdy jalǵastyrýda dep habarlaıdy Qamshy.kz aqparat agenttigi Atyraý oblysynyń Óńirlik komýnıkasıalar qyzmetine silteme jasap.

Qala ishinde jolaýshylar tasymalyna arnalǵan bul avtobýstardyń uzyndyǵy 8,5 metr. Syıymdylyǵy 50 jolaýshy. Qostanaı qalasynan shyǵarylǵan «Ankai» markaly avtobýstar «Aıs Trans Holdıń» mekemesine senimgerlik basqarýǵa berilgen.

"Oblys ákiminiń tapsyrmasymen qoǵamdyq kólikterdi jańartý jumystary qarqyndy júrip jatyr. Qoǵamdyq kólikterdi «Aıs Trans Holdıń» mekemesine senimgerlik basqarýǵa berip jatyrmyz. Onyń beseýi №10 avtobýsqa, qalǵan beseýi №20 avtobýsqa berildi. Avtobýstar qazirgi zaman talaptaryna sáıkes keledi. İshinde arnaıy salqyndatqyshy, múmkindigi shekteýli jandarǵa pandýstar ornatylǵan, sondaı-aq, 4 beıne baqylaý kamerasymen jabdyqtalǵan",- deıdi jolaýshylar tasymaly jáne avtomobıl joldary basqarmasynyń basshysy Áset Orazǵalıev.

Aıta keteıik, Atyraý oblysynyń ákimi Nurlan Noǵaev Atyraýdaǵy qoǵamdyq kóliktiń jańa tujyrymdamasyn engizý týraly jarıalady. Jolaýshylar tasymaly reformasy jańa avtobýstar satyp alýdy, qosymsha baǵyttardy damytýdy, sondaı-aq qalalyq qoǵamdyq kólikte qyzmet kórsetý sapasyn jaqsartýdy qamtıdy.