Sot Muhtar Jákishevti merziminen buryn bostandyqqa shyǵarýdan bas tartty dep jazady Qamshy.kz aqparat agenttigi. 

Sýdıa Ermek Shymyrbaev Jákishevtiń memleketke keltirilgen shyǵyndy tolyq ótemegenin aıta ketti. Onyń ózin úshinshi dárejedegi múgedektigi men túrmede ózin tártipti ustaýy da bosap shyǵýyna sebep bolmaıtynyn aıtty.

Jınalǵandar "Uıat! Masqara!" dep aıǵaılap, óz narazylyqtaryn bildirdi. 

Aıta ketsek, búgin 10:00-de Semeı qalasynda Muhtar Jákishevti merziminen buryn bostandyqqa shyǵarý týraly sot otyrysy ótti. 

Ol 2009 jyly mamyrda ustalǵan soń sybaılas jemqorlyq qylmysyn jasady dep aıyptalyp, 14 jylǵa sottalǵan. Ol jazasyn óteýge aldymen Almaty oblysyndaǵy Zarechnyı kentindegi túrmege jiberilgen, keıin Qaraǵandy oblysynyń Dolınka kentindegi qatań rejımdegi AK-159/6 kolonıasynda boldy. 2015 jyly týystary, advokaty men quqyq qorǵaýshylardyń ótinishiniń arqasynda ol Dolınkadan qaıta Zarechnyıǵa jiberilgen. Biraq 2017 jyly UQK-niń burynǵy tóraǵasy Nartaı Dútbaevtyń isine qatysty tergeý isine qatysý úshin Astana qalasynyń ızolátoryna etappen jiberilgen. Tergeý isi aıaqtalǵan soń mamyr aıynda Dolınkaǵa, al shilde aıynan beri Semeı qalasyndaǵy qatań rejımdegi kolonıada jazasyn ótep jatyr.

Eske sala ketsek, «Qazatomprom» eks-basshysynyń advokaty Nurlan Beısekeev sońǵy medısınalyq tekserilýden soń onyń bas mı júıesinde aqaý bar ekeni anyqtalǵanyn aıtqan bolatyn.  Keıin byltyrǵy jyldyń 17 shildesinde Jákishovti Qaraǵandy oblysyndaǵy kolonıadan SHQO-oblysy Semeı qalasyndaǵy qatań rejımdi kolonıaǵa aýystyrdy. Osynyń sebebinen Muhtar Jákishevtiń densaýlyǵy taǵy da nasharlaı tústi.

Al jazda onyń jaǵdaıy múldem asqyna bastady. Jákishev úshinshi toptaǵy múgedek qataryna qosylyp, jumys jasaý qabiletiniń 50 paıyzynan aıyryldy. Sonymen birge Muhtar Jákishevtiń joǵary qan qysymnyń kesirinen kózdiń ishki tor qabyǵy jarylyp ketken. Kúz  mezgilinde Qaraǵandy qalasynda Jákishevtiń kózine operasıa jasaldy. 

Bul az bolǵandaı, qyrkúıek aıynda Muhtar Jákishevtiń anasy qatty syrqattanyp qaldy. Jákishev hál ústinde jatqan naýqas anasymen kezdesýine ruqsat berýin surap, ótinish jazdy. Alaıda 18 qyrkúıekte Muhtar Jákishevtiń anasy qaıtys boldy. Keıin qaraly habardy estigen Muhtar Jákishev anasyn sońǵy saparǵa shyǵaryp salýdy surap, ótinish jazdy. Biraq oǵan mundaı múmkindik berilmedi.