Arystyq balalar «Tulpar» tynyǵý lagerinde eki aýysym boıy demalady. Oblystyq bilim berý basqarmasynyń bas mamany Karıma Bókenovanyń aıtýynsha, josparǵa saı olardy aldymen «Han ordaly Saraıshyq» jáne tarıhı-ólketaný murajaılaryna aparǵan.
Maqsat, balalardy ólke tarıhymen tanystyrý. Sondaı-aq, búldirshinderdiń boıyna áskerı-patrıottyq tárbıe sińirý úshin, lagerdegi áskerı klýbtar da qarqyndy jumys júrgizýde. Budan bólek, demalýshylardy qala tynysymen tanystyryp, túrli oıyn-saýyq ortalyqtaryna aparý josparda bar. Sonymen qatar, Atyraýlyq kásipkerlerdiń qoldaýymen Arystan kelgen balalarǵa sporttyq kıimder men mektep quraldary jáne jazdyq jeıdeler tabystaldy. Syılyqqa kenelgen bóbekterdiń qýanyshynda shek joq. Solardyń biri, Arystyq Shyńǵys Sattarhan:
- Men munda kelgenime 3 apta boldy . Sodan beri túrli-túrli saıystarǵa qatysyp, konserttik sharalar kórip jatyrmyz. Oǵan qosa, «Saraıshyq» kóne qalashyǵyna bardyq. Ol jer maǵan qatty unady. Jalpy, bizdiń kóńilimizdi kóterip barlyq jaǵdaı jasap jatyrǵan Atyraý oblysynyń turǵyndaryn jáne lagerdegi apaılaryma kóp rahmet aıtamyn. Sondaı-aq, bizge mektep quraldary men kıim-keshek berip jatyrǵan kásipker aǵa-apalarymyzǵa aıtar alǵysymyz sheksiz, - dedi ol.
Pikir qaldyrý