Ǵabıdolla Ábdirahymovtyń Shymkent qalasy ákimi laýazymynan bosaýyn jýyrda London kósheleriniń birinde júrip túsirgen daýly vıdeosymen baılanystyryp jatqandar kóp. Bul Ábdirahymovtyń qoǵamda jıi talqylanǵan alǵashqy málimdemesi emes, dep habarlaıdy Qamshy.kz aqparat agenttigi Tengrinews.kz saıtyna silteme jasap. Solardyń keıbirin eske túsirýdi jón kórdik.

"Áıelderińe ıe bolyńdar!"

Arystaǵy jarylystan keıin mıtıńige shyqqan turǵyndardyń aldyna kelgen Shymkent ákimi er adamdardy aıyptaǵan bolatyn. "Men erkekterge renjip otyrmyn. Áıelder aıqaılaıdy, sóıleı beredi. Al erkekterge ne joq? birinshi, óz áıelderińe ıe bolyńdar! Sodan keıin el týraly aıtyńdar. Ózderiń áıelderińe ıe bola almaı, maǵan kelip áńgime aıtasyńdar", – dep sherýge shyqqandarǵa ashýlanǵan edi.

"Otanyń men anańdy tańdaı almaısyń"

Byltyr qarashada Ábdirahymov qazaqstandyqtardan Otanyn basqa memlekettermen salystyrmaýyn suraǵan bolatyn. "Qazir men baspasózden mynany oqımyn – Amerıkada bylaı, Eýropada bylaı, bizde nege olaı emes. Men sizderge aıtaıyn, bizde olarǵa qaraǵanda áldeqaıda jaqsy, erkin ómir, bizde rýhanı dúnıe bar. Osyny saqtap qalý kerek. Otanyń men anańdy tańdaı almaısyń. Sizder kóshede júrip "Myna áıel ádemirek eken, men osyny anamnyń ornyna tańdaımyn" demeısizder ǵoı, – dedi ákim.

"Halyq áıel sekildi"

Byltyr, taǵy sol qarashada Ábdirahymov Nur-Sultanda ortalyq komýnıkasıalar qyzmetinde ótken brıfıńte halyqty áıelge teńeıtinin aıtqan bolatyn.

 "Men halyqty áıelge teńeımin. Halyq áıel sıaqty. Ózderińiz de bilesizder, áıel qamqorlyqty, mahabbatty qalaıdy. Jylýlyq qalaıdy, ózine kóńil aýdarǵanyn jaqsy kóredi. Eger oǵan osynyń barlyǵyn der kezinde bermeseń, olar kóterilis jasaýy da ǵajap emes. Halyqpen de týra sondaı qarym-qatynas jasaý kerek", – degen edi Ábdirahymov.

"Shymkent qalasy - zyń"

2017 jyly Shymkent qalasynyń týǵan kúnin atap ótip jatqanda "Qyzyq Times" shoýy konsert ótkizip, sahnaǵa Ǵabıdolla Ábdirahymov shyqqan. Sol kezde júrgizýshiler qala basshysynan Shymkentti bir sózben sıpattap berýdi suraıdy. Osy kezde Ǵabıdýlla Ábdirahymov "Shymkent qalasy – zyń" dep qaljyńdaǵan.