Áleýmettik jelide taraǵan Alakól kóline qubyr arqyly laı sý tógilip jatqany beılegengen vıdeoǵa baılanysty Almaty oblysy Alakól aýdany ákiminiń baspasóz qyzmeti túsinik berdi dep jazady Qamshy.kz aqparat agenttigi inform.kz-ke silteme jasap.

Máselege qatysty Alakól aýdanynyń ákimdigi arnaıy komısıa qurylǵanyn jetkizdi.

«Qurmetti Alakól aýdanynyń turǵyndary men qonaqtary! Beınejazbada kórsetilgen sý «Kóktem grand» demalys ornynyń baseıninen aqqan sý ekenin habarlaımyz. Kólge eshqandaı zıany joq. Aýdan ákimdiginiń qyzmetkerleri tarapynan atalǵan jerge baryp, tekserý jumystary júrgizildi. Ózderińizge belgili taralǵan beınejazbada kórsetilgen «Kóktem Grand» demalys ornynyń baseıninen kólge quıylyp jatqan sý máselesi boıynsha búgin aýdandyq komısıa quryldy», – dedi Alakól aýdany ákiminiń baspasóz qyzmetinen.

Qazir sorǵyshtan aqqan sý toqtaǵan.

"Beınejazbadaǵy aqqan sý eshqandaı hlorsyz, taza baseınniń kólden alynǵan sýy. Sý soratyn sorǵysh sol ýaqytta isten shyqqandyqtan, ishke alynatyn sý keri qaıtqan. Al demalys ornynyń dárethana qubyry bólek jerde ornalasqan. Aýdandyq taýarlar men kórsetilgen qyzmetterdiń sapasy men qaýipsizdigin baqylaý basqarmasynyń mamandary qazirgi ýaqytta zerthanalyq synamalar alýda», – delingen Alakól aýdany ákiminiń baspasóz qyzmeti taratqan aqparatta.

Eske sala keteıik, Alakól kóline belgisiz laı sý qubyr arqyly tógilip jatqanyn týrıster habarlaǵan bolatyn. Beınejazbaǵy málimetke sáıkes, kólge tógilip jatqan sýdyń jaǵymsyz ıisi bar.