Jambyl oblysda aǵymdaǵy jyldyń jarty jylynda ekonomıkanyń ósýi – 103,8 paıyzdy qurap otyr. Bul týraly oblys ákimi  Asqar Myrzahmetov oblystyq máslıhattyń kezekten tys ótken sesıasynda aǵymdaǵy jyldyń alǵashqy jartyjyldyǵyna bergen esebinde baıandady.

«Ónerkásip óndirisiniń kólemi 3 paıyzǵa, óńdeý ónerkásibi 5,4 paıyzǵa ósti. Negizgi kapıtalǵa salynǵan ınvestısıa 12,7 paıyzǵa artty. Osy oraıda búdjetten tartylǵan ınvestısıa azaıyp, jeke sektordyń úlesi kóbeıip kele jatqanyn aıtýǵa bolady. Esepti kezeńde 17 mıllıard teńgege 7 joba iske qosyldy. Jyl sońyna deıin 46 mıllıard teńgege 9 joba iske asyrylady. 32,2 mıllıard teńgege baǵalanǵan 2 joba shetel ınvestorlarynyń qatysýymen atqarylady. Olar – «Kaz-ir Agro» JSHS-niń (Iran) «Saflor maıyn shyǵarý zaýytyn keńeıtý» jáne «M-KATGREEN» (Fransıa) kompanıasynyń «Kún elektr stansasynyń qurylysy men paıdalanýy» jobalary.

Bólshek saýda 104,3 paıyzdy, kóterme saýda 109,8 paıyzdy qurady.

Inflásıa deńgeıi (2018 jyldyń jeltoqsanyna) 102,3 paıyz. Bul respýblıkalyq orta kórsetkishten tómen.

Aýyl sharýashylyǵynyń ónimi – 103,8 paıyz, ıaǵnı 2 myń gektarǵa artyp, 670 myń gektarǵa jetti. Egin orý ótken jyldan 60 paıyzǵa joǵary (2018 jyly – 39,5 myń, 2019 jyly – 64,7 myń gektar).

Ótken jyly qurylǵan mehotrád 99 shaqyrym kanaldardy tazalap (27 kanal, 5 sý qoımasy), 6,6 myń gektar sýarmaly jer qalpyna keltirildi, – dedi oblys ákimi Asqar Isabekuly.

Sondaı-aq, bıyl táýligine 8 myń tonna qant qyzylshasyn óńdeıtin qant zaýytynyń qurylysy tamyz aıynda bastalmaq. Joba Shý aýdanyndaǵy arnaıy ekonomıkalyq aımaqta salynady.

Oblysta qurylys kólemi 12,4 paıyzǵa ósip, 226 myń sharshy metr turǵyn úı paıdalanýǵa berilip, 6,2 paıyzǵa artty. Onyń ishinde 260 páter kópbalaly jáne az qamsyzdandyrylǵan otbasylaryna berildi. Budan basqa, demeýshiler esebinen 24 otbasy turǵyn úımen qamtamasyz etildi.

Baspanaǵa muqtaj az qamtylǵan jáne kópbalaly otbasylaryn turǵyn-úı kezegi jetkenge deıin jatahanamen qamtý úshin Taraz qalasynjda arnaıy 8 jataqhananyń qurylysy bastaldy.

Jeke turǵyn úı qurylysyna 2877 jer telimi beriledi. Budan bólek, tek elektr qýatyn tarta otyryp 17 alqapta 3722 jer telimin berý qarastyrylyp jatyr.

Qýanysh Keýilimjaı