Jambyl oblysynda respýblıkalyq mańyzy bar «Merki-SHý-Býrylbaıtal» kólik jolynyń qurylysy jáne taǵy da basqa memlekettik baǵdarlamalar aıasynda birneshe iri jobalar júrgizilip jatyr. Aǵymdaǵy jyldyń alǵashqy jartyjyldyǵy boıynsha oblysta búdjet 99,6 paıyzǵa ıgerilgen. Bul týraly oblys ákimi  Asqar Myrzahmetov oblystyq máslıhattyń kezekten tys ótken sesıasynda bergen esebinde aıtty.

«Jalpy 600 shaqyrym jergilikti avtojoldar men kóshelerdi jóndeý júrgizilýde (16,2 shaqyrym jańa jol salynyp, 6,2 shaqyrymy qaıta jańǵyrtylyp, 30 shaqyrymy kúrdeli jáne 550 shaqyrymy orta jóndeýden ótedi) Oǵan respýblıkalyq búdjetten – 8 mıllıard, jergilikti búdjetten 6,8 mıllıard teńge bólindi. Nátıjesinde «qanaǵattanarlyq jergilikti avtojoldardyń úlesi» 85 paıyzǵa jetedi (2018 jyly – 80,1 paıyz)», - dedi oblys ákimi.

Sonymen qatar, oblys ákimi aımaqtaǵy gazdandyrý jáne aýyz sý máselesine de toqtalyp ótti.

«Gazǵa qatysty aıtsaq, 5 aýdanda 81 eldi mekendi (101 myń adam) gazdandyrý jumystary bastaldy (jyl sońyna 9 eldi mekende jumystar aıaqtalady). Budan bólek,búdjettik baǵdarlamalardy tospaı merdigermen tikeleı kelisim shart arqyly gaz tartý máselesin qarastyryp otyrmyz.

Buryn bir aýlaǵa shaqqandaǵy jumystyń quny 470 pen 650 myń teńge aralyǵynda bolatyn. Komýnaldyk 2 mekemege – «Jambyl jylý», «Temir jol jylýǵa» arnaıy lısenzıa alyp berip, bul baǵany 300 myń teńgege deıin túsirip otyrmyz. Osynyń nátıjesinde qosymsha 32 myń halyq gazǵa qol jetkizetin bolady.

Ortalyqtandyrylǵan aýyz sýmen qamtylǵan 199 eldi mekende 130 myń adam sý qubyry bola tura, sýǵa qosylmaǵanyn anyqtadyq. Alty aıdyń qortyndysymen 34 myń adam qubyrǵa qosyldy. Jyl sońyna deıin taǵy da 30 myń adam sý júıesine qosylatyn bolady. Bul da komýnaldyq mekememen atqarylyp jatqan jumystyń esebinen. Buǵan qosa, búdjet boıynsha 18 eldi mekenge sý qubyrlary júrgizilýde, onyń 10 jobasy iske qosylady, qamtý úlesi 56 paıyzǵa jetedi, – dedi Asqar Isabekuly.

Myrzahmetovtyń aıtýynsha, oblys búdjetiniń kirisi ótken jyldan (2018 jyly – 251,2 mıllıard teńge) 51,6 mıllıard teńgege (20 paıyz) artyp, búginde 302,8 mıllıard teńgeni quraǵan. Sonymen qatar, Ulttyq qordan áleýmettik salaǵa qosymsha 9,2 mıllıard  teńge bólinip otyr. Jalpy oblysta jartyjyldyń qorytyndysy boıynsha, búdjettik kiris 103,9 paıyzǵa, menshikti kiris 119,5 paıyzǵa (32 mıllıard teńge) oryndalǵan. Búdjet 99,6 paıyzǵa ıgerilgen.

Qýanysh Keýilimjaı