Túrkistan oblysy Arys qalasyndaǵy áskerı qoımadaǵy jarylys kezinde jaralanǵan úsh adamnyń biri segiz jasar Aıan Sháripbek aýrýhanada qaıtys boldy. Bul týraly balanyń ákesi Erbol Sháripbek habarlady dep jazy Qamshy.kz aqparat agenttigi.

Búginge deıin Nur-Sultan qalalyq № 2 balalar aýrýhanasynyń jan saqtaý bóliminde jatqan balanyń dárigeri Aıdyn Nurtasulynyń sózinshe, Aıannyń júregi 2 tamyzda tańerteń toqtaǵan.

24 maýsymda Arystaǵy áskerı qarý-jaraq qoımasynda jarylys bolyp, adamdardy evakýasıalap jatqan kezde 8 jasar Aıan Sháripbekti kólik qaǵyp ketip, basy jaraqattanǵan edi. Búldirshindi 28 maýsymda sanavıasıamen Nur-Sultan qalasyna shuǵyl jetkizgen. Dárigerler operasıa jasap, shetelden mamandar shaqyrtylǵan.

Ákesi Erbol Sháripbektiń sózinshe, úıdiń kenjesi Aıan zerek ári pysyq bala bolǵan. Buǵan deıin Azattyqqa bergen suqbatynda Erbol Sháripbek Arys qalasyndaǵy jedel járdemniń ulyna der kezinde kómek kórsetpegenin aıtqan.

Aıan Sháripbek – Arystaǵy áskerı qoımadaǵy jarylys saldarynan ómiri qıylǵan tórtinshi adam. Buǵan deıin Qazaqstan densaýlyq saqtaý mınıstrligi úsh adam – bir beıbit turǵan men eki áskerı jan tapsyrǵanyn habarlaǵan. Jarylystan soń 400-den astam azamat dáriger kómegine júgingen. Taǵy 80 adam túrli jaraqatpen aýrýhanaǵa jatqyzylǵan.

Ásemgúl Muhıtqyzy

azattyq.org