Aıtysker aqyn Jandarbek Bulǵaqov Toqtar Áýbákirovtiń jomarttyǵyna kýá bolǵan oqıǵasyn aıtyp berdi dep jazady Qamshy.kz aqparat agenttigi. Oqyrmanǵa qolaıly bolý úshin aıtylǵan áńgimeniń murtyn buzbaı berýdi jón kórdik. 

"Eki-úsh jyl buryn bir tanysym qaryzǵa kirip, biraz qınaldy. Qınalǵany sonsha, Franklın atanyń sýreti bar kók qaǵaz tabylmaǵan soń tipti, bir búıregin satpaqshy da bolǵan. Úlkenimiz bar, kishimiz bar bárimiz jabylyp júrip ol oıynan aınyttyq. Sol tanysym bir kúni maǵan kelip, “Toqtar aǵanyń úıine baryp jaǵdaıdy aıtaıyqshy, meni tanymasa da, seni tanyp qalýy múmkin ǵoı” dedi. Jaqsy dep Qaraǵandy trassasynyń boıyndaǵy Toqtar aǵanyń úıin taýyp bardyq. Jer úı eken. Ǵaryshker aǵamyz ańǵa shyǵýǵa qamdanyp keteıin dep turǵan shaǵy sol eken, bizdi kórip jaǵdaıdy asyqpaı tyńdady.

Sóıtti de, “Inim búıregimdi satam degen sózdi qoı, sen suraǵan aqsha mende de joq, má myna kólikti sat ta, qaryzyńnan qutyl” dep temir tulparynyń kiltin qolymyzǵa ustatty da jiberdi. Búıregin satam dep turǵan jigit te, men de júregin julyp bererdeı baýyrmaldyq tanytqan aǵamyzǵa qatty rıza boldyq. Qınalyp, qajyp júrgen pendege jyly sózdiń ózi úlken járdem eken ǵoı. Tanysym júzi jaınap, “Joq aǵa! Osy isińizdiń ózi maǵan úlken qajyr qaırat syılady. Biz úshin siz jaıaý júrmeńiz” dep kóligin ózine qaıtardy. Men azamattyq, márttik, adamgershilik pen baýyrmaldyq degenniń shynaıy kórinisin osy kezde ǵana kórdim", – dep jazady ol.