Ońtústik Qazaqstan oblysynyń ákimi Asqar Myrzahmetov Shymkent qalasynyń jańa ákimshilik-iskerlik ortalyǵyndaǵy alańda úzdik mektep túlekterine «Altyn belgi» tabystady. Saltanatty sharada oblys basshysy bilim sapasynyń jyldan jylǵa artyp kele jatqanyna toqtalyp, bıyl «Altyn belgi» ıegerleriniń sany 608-ge jetip, byltyrǵymen salystyrǵanda 173-ke artyp otyrǵandyǵyn. UBT qorytyndysy boıynsha oblystyń orta baly – 78,7 bolǵandyǵyn aıtty, dep habarlaıdy OQO ákiminiń baspasóz qyzmeti.
Sapaly bilim men tárbıe bergen ustazdar men ata-analarǵa alǵys aıtyp, úlken ómirge qadam basqaly turǵan túlekterge sáttilik tilegen óńir basshysy UBT-dan 125 bal jınaǵan túlkibastyq Laýra Abdazımovaǵa 500 myń teńgeniń sertıfakaty men «Altyn belgini» tabystady. Ózge de úzdikter saltanatty shara kezinde marapattaldy.
Sondaı-aq, UBT-dan oqýshylary joǵary nátıje kórsetken birqatar mektep dırektorlary men L.Abdazımovanyń synyp jetekshisine (Maqtaral aýdany B.Momyshuly atyndaǵy mektep-gımnazıa, Túrkistan qalasy daryndy balalarǵa arnalǵan mektep-ınternat, Maqtaral aýdany daryndy balalarǵa arnalǵan mektep-ınternat) Qurmet gramotasyn tapsyrdy.
Bıyl oblysta mektep bitirgen 30075 túlektiń 18112-si ulttyq birińǵaı testileýge qatysty. Al 96 oqýshy halyqaralyq olımpıada men ǵylymı jobalar jarysynyń jeńimpazdary retinde test tapsyrýdan bosatylǵan.
Aıta keteıik, UBT-da 3398 bitirýshi 100 baldan joǵary kórsetkishke ıe boldy. Al, joǵary 125 baldy – 1, 124 baldy – 5, 123 baldy – 22 oqýshy jınady. Aıta keterligi, sońǵy tórt jylda oblystyń orta baly 11,8 balǵa joǵarylap, «Altyn belgi» sany 366-ǵa artqan.
