100 myń teńge tirkeýde turǵandarǵa túgel taratylady. Anyqtalǵan 55 myńnan astam adam 12 tamyzdan bastap qarajatqa qol jetkizedi dep habarlaıdy Qamshy.kz aqparat agenttigi Túrkistan oblysy ákiminiń baspasóz qyzmetine silteme jasap. 

Búgingi tańda eki aýyldyq eldi meken men Arys qalasyndaǵy 17 sektorda bank kartochkalary taratylýda. Qyzylorda, Jambyl jáne Shymkent qalasynan «Halyq bankiniń»  120 qyzmetkeri Arysqa arnaıy kelip jumys júrgizýde. Túrkistan oblysy ákiminiń orynbasary Joldymurat Amanbaev, aqshany alýdyń tártibin túsindirdi.

«Osy ýaqytta 33 myń bank kartochkasy jasaldy. Elimiz egemendigin alǵanan beri dál bulaı, bir aıdyń ishinde osynshama qujat jınalyp, 33 myń kartochkany daıyndaý degen bolǵan emes. Qazirgi tańda sol daıyn bolǵandary taratylyp jatyr. Biraq ázirge aqsha salynǵan joq. Iaǵnı, 100 myń teńgeni 12 tamyzdan bastap ala alady. Al qazirgi negizgi jumys kartochkany taratý. Demek, barlyǵy túgel qol jetkizgende aqshany túsiremiz. Eń kóp 9 sektorda 3771 qujat jınalǵan. Qalany kóshe-kóshege bóldik», – dedi oblys ákiminiń orynbasary J.Amanbaev.

Eldi sabyrǵa shaqyrǵan jaýapty basshylar, turǵyndardyń tolǵandyrǵan suraqtaryna jaýap beretin, arnaıy komısıa jumys jasap jatqanyn jetkizdi. Al tizimge kirmeı qalǵan oqýshylar, mektepter arqyly anyqtalyp jatqany belgili boldy.

Aıta keteıik, ótemaqy qarjyny Respýblıka kóleminde «Halyq bankiniń»  kez kelgen bankomatynan alýǵa bolady. Qarjynyń túsken nemese túspegenin anyqtaý úshin, kartochkany bankomatta 3-retten artyq qoldanýǵa bolmaıdy. Sebebi 3 retten artyq qoldanǵan jaǵdaıda banktik komısıa tólemi ustalady. Sonymen qatar sot sheshimderimen qaryzdary bolǵan azamattarǵa tólem kartochkalary ashylmaıdy. Mundaı jaǵdaıda azamat senimdi ókiline notarıaldy senim bildire otyryp, ótemaqyny senim bildirgen ókili arqyly alýyna bolady. Al úılerinde bolmaǵan azamattar kartochkalaryn 2019 jyldyń 15 tamyzynan bastap, Arys qalalyq «Halyq bank» fılıaldarynan alýyna bolady. Kartochkaǵa túsken qarjydan banktiń komısıalyq tólemderi ustalmaıdy. Jalpy, búginde tańda Arys qalasynda halyq bankiniń 12 bankomaty qoıylǵan. Sonymen qatar qosymsha taǵy 7-8 bankomat ornatylmaq.