Memleket basshysy Qasym-Jomart Toqaevtyń tapsyrmasyna sáıkes kópbalaly otbasydan jáne ataýly áleýmettik kómek kórsetiletin otbasydan shyqqan balalarǵa qosymsha 5 myń grant bólindi dep habarlaıdy Qamshy.kz aqparat agenttigi QR Bilim jáne ǵylym mınıstrliginiń saıtyna silteme jasap.

Atalǵan granttar jergilikti atqarýshy organdarmen konkýrstyq negizde beriledi. Bul úshin oblys, respýblıkalyq mańyzy bar qalalar men astana ákimderimen konkýrstyq komısıalar qurylatyn bolady.

Kórsetilgen granttarǵa kópbalaly otbasydan shyqqan nemese ataýly áleýmettik kómek kórsetiletin otbasydan shyqqan balalar úmitker bola alady.

Konkýrsqa qatysý úshin 2019 jylǵy maýsym aıynda ótkizilgen UBT-dan shekti bal jınaý konkýrstyń negizgi sharty bolyp tabylady.

Ulttyq joǵary oqý oryndaryna túsý úshin ulttyq biryńǵaı testileý nátıjesi boıynsha – keminde 65 bal, basqa joǵary oqý oryndaryna – keminde 50 bal, «pedagogıkalyq ǵylym» baǵyty boıynsha – keminde 60 bal jınaý kerek.

Konkýrsqa qujattar 5 men 10 tamyz aralyǵynda qabyldanady.

Bilim granttaryn taǵaıyndaý jáne joǵary oqý oryndaryna qabyldaý 25 tamyzǵa deıin júrgiziledi.

Konkýrsqa qatysý úshin qujattar tizimi:

1) belgilengen úlgidegi blankide ótinish;

2) bilimi týraly qujat (qujattardy qabyldaý komısıasyna tapsyrǵan kezinde túpnusqa);

3) UBT sertıfıkaty;

4) 086-Ý nysany boıynsha medısınalyq anyqtama;

5) jeke basyn kýálandyratyn qujattyń kóshirmesi.

Sondaı-aq, balalardyń kópbalaly otbasynan shyqqan nemese ataýly áleýmettik kómek kórsetiletin otbasy qatarynan ekendigin rastaıtyn qujattar kórsetilýi kerek.