«Baldáýren» balalardy saýyqtyrý ortalyǵynda balalardy qabyldaýdyń ekinshi maýsymy bastaldy. Qazir munda shahar mektepterinen jınalǵan júzge jýyq balǵyn túrli úıirmelerge qatysyp, ýaqytyn tıimdi ótkizip júr. Tańǵy saǵat 8:30 boldy degenshe balalar men jasóspirimder ortalyǵynda qaınaǵan ómir bastalady. Sapqa tizilgen «baldáýrendikter» denesin shynyqtyryp alyp, tamaqqa toıynady. Odan soń dop teýip, shomylý men túrli úıirmelerge bastaýyshtyń oqýshylary kirisedi de ketedi.
Saýyqtyrý ortalyǵynda 10 úıirme bar. Ebi men qyzyǵýshylyǵy basym oqýshylar ár túrli úıirmege jazylyp, osynda kelgen 8 kúnin bos ótkizbeıdi. Árqaısysy bir-bir úıdiń erkesimen jumys isteý mundaǵylarǵa da ońaı emes. Lagerge kelgen árbir balanyń tilin tapsa — maqsattyń oryndalǵany.
«Baldáýren» saýyqtyrý ortalyǵy balalardy jeti jyl qatarynan qabyldap keledi. Munda tynyǵatyn balǵyndardyń 35 paıyzy jetim jáne áleýmettik jaǵdaıy tómen, sonymen qatar, kópbalaly otbasylardan shyqqan balalar.
Islam Kópjasarov, Shymkent qalalyq balalar men jasóspirimder ortalyǵy dırektorynyń orynbasary: «Balalar kelgen sátte birinshi, ekinshi kúnderi lagerge azdap úırenise almaı qınalyp jatady. Al osyndaǵy balalarmen tanysyp, dostasyp ketken soń keterde bir-birin qımaı, baýyr basyp qalatyny bar. Sondyqtan mundaı saýyqtyrý oryndary barsha balaǵa kerek. Bul — dostyqtyń mekeni. Munda kelgen bala ári dos tabady, ári kásiptik te baǵdar alady.»
Caýyqtyrý lageri tamyz aıynyń aıaǵyna deıin jumys isteıtin bolady. Osy 6 maýsym boıy balalardy túrli óner túrine baýlımyz dep otyrǵan mamandar qyrkúıekke deıin 500-deı oqýshyny qamtymaq.
