Shymkenttegi bilim oshaqtarynda jańa oqý jylyna daıyndyq maýsymy bastalyp ketti. Shaharda 6 mektep pen 7 balabaqshany kúrdeli jóndeý jumystary qolǵa alyndy.

Bul úshin respýblıkalyq búdjetten 286 mln teńge, oblystyq qazynadan bir mlrdtan astam qarjy qaralsa, jergilikti búdjetten 500 mln teńge qarajat berilgen. Budan bólek 50 mln teńgege 113 bilim mekemesi áktelip, syrlanady. Bir qyzyǵy, osynshalyqty aýqymdy sharýa nebári úsh merdigerge tapsyrylǵan. Muny bilgen ata-analar jańa oqý jylyna úlgermeı qalady dep dabyl qaǵýǵa daıyn otyr. 1960 jyly salynǵan bilim oshaǵynyń asqanasy men sport zaly qaıta salynady. Alǵashqy ǵaryshker Iýrıı Gagarınniń esimin alǵan bilim oshaǵynda 1400 oqýshy bar. Bul nysanǵa eń jaqyn ornalasqany — Elaman aýylyndaǵy № 127 mektep. Alaıda búkil shákirtti onda tasymaldaý múmkin emes. Sol sebepti bilim bóliminiń basshylary merdiger mekemege eski ǵımarattyń korpýsyn birinshi kezekte jóndeýden ótkizý talabyn qoıyp otyr.

Budan bólek qalalyq máslıhattyń depýtattary №38 mekteptiń kúrdeli jóndeý jumysyna baǵyttalǵan qarjy ne sebepti №25 mektepke jumsalynady degen saýaldy jıi kóterip keledi. Esterińizde bolsa, 2014 jyly №38 mektepti kúrdeli jóndeýden ótkizý úshin 260 mln tenge qaralǵan. Al bıylǵa qalǵan 128 mln teńgeni ıgerý kerek. Alaıda bilim bólimindegiler ol qarajatty ózge mektepke jumsapty.

Pazylhan Asaýov, qalalyq bilim bóliminiń sektor meńgerýshisi: «№38 mektep eki kezeńde kúrdeli jóndeýden ótkizildi, úshinshi kezeńin kelesi jylǵa qaldyrdyq. al №25 mektepke ol qarjy óte qajet, bastalǵan qurylysty aıaqtaý kerek.»

Jalpy bıylǵy jańa oqý jylynda Shymkent shahary boıynsha 5 jańa mektep pen 6 balabaqsha paıdalanýǵa berilmek.