Elordanyń kólik polısıasy esirtki tasymaldaǵan jolserikti ustady.

"9 naýryz kúni saǵat 6:10-da Kólik polısıasy departamentiniń qyzmetkerleri Nur-Sultan qalasynyń temirjol vokzalynda jedel-izdestirý sharalaryn júrgizý barysynda "Qyzylorda-Kókshetaý" baǵytyndaǵy poıyz jolserigi – Qyzylorda oblysynyń 43 jastaǵy turǵynyn ustady. Tergeý soty sanksıalaǵan jeke tintý barysynda asa iri kólemde esirtki tasymaldaǵany úshin alǵan 80 000 teńge qarajat tabyldy. Sál keıin kúdikti sómkeni kútip alatyn adamdy izdestirý sharalarynyń nátıjesinde, 1982 jyly týǵan er adam ustaldy. Onyń jeke zattarynan saraptamaǵa sáıkes, 3742 gram "keptirilgen marıhýana" esirtkilik zaty tabyldy", – delingen kólik polısıasy departamentiniń habarlamasynda.

 Asa iri kólemde esirtki zatyn tabý faktisi boıynsha eki kúdiktige qatysty sotqa deıingi tergeý jumystary sol kúni bastaldy. Olarǵa QR Qylmystyq kodeksiniń 296-baby, 4-bóligi jáne 297-baby, 2-bóligi boıynsha aıyp taǵyldy. Tergeý aıasynda 43 jastaǵy er adamnyń qyzmettik ókilettigin paıdalanyp, Qyzylorda oblysynan elordaǵa birneshe ret esirtki zattaryn tasyǵany anyqtaldy. Nur-Sultan qalasynyń qylmystyq ister jónindegi mamandandyrylǵan aýdanaralyq sotynyń úkimimen sottalýshy QR QK 296-baby, 4-bóligi boıynsha aıypty dep tanylyp, 4 jylǵa bas bostandyǵynan aıyryldy. Qylmystyq istiń ekinshi fıgýranty QR QK 296-baby, 4-bóligi boıynsha 3 jylǵa abaqtyǵa qamaldy.

Aıjan Serikjanqyzy