Atyraý oblysynyń ákimi Nurlan Noǵaev dıplomatıalyq qyzmettiń ardageri Qaırat Isaǵalıevpen kezdesti Qamshy.kz aqparat agenttigi.

Kezdesýge dıplomattyń seriktesteri, aýyldastary shaqyryldy.

Atyraý oblysynyń Qurmanǵazy aýdanynda týyp- ósken Qaırat Isaǵalıev Almatydaǵy shet tilderi ınstıtýtyn fransýz tili mamandyǵy boıynsha aıaqtap, birneshe jyl Aljırde aýdarmashy qyzmetin atqardy. Budan soń shet eldermen dostyq jáne mádenı baılanystyń Qazaq qoǵamynda, Qazaqstan Kompartıasy OQ-niń halyqaralyq baılanystar bóliminde, QR Syrtqy ister mınıstrliginde jumys jasady, qazaqstandyq sheteldik týrızm salasyn basqardy. Qazaqstandyq dıplomatıanyń qalyptasý kezeńinde Qaırat Isaǵalıev IýNESKO-men baılanys komısıasynda belsendi qyzmet etip, osy qurylymnyń qalyptasyp, damýyna zor úles qosty. Sol jyldary Q.Isaǵalıev QR SİM-niń mádenı jáne gýmanıtarlyq qarym-qatynas basqarmasynyń basshysy bolǵan edi.

Óńir basshysy Nurlan Noǵaev dıplomatıalyq qyzmettiń úlken jaýapkershiligi men joǵary mártebesin atap ótti. Bógde jurt dıplomattarǵa qarap, onyń eli týraly, memlekettiń bilim jáne mádenı deńgeıi, ekonomıkalyq jáne geosaıası áleýeti týraly oı túıedi.
Dıplomatıalyq qyzmettiń ardageri Qaırat Isaǵalıevtiń uly Arman da kezdesýge qatysty. Osydan úsh jyl buryn Memleket Basshysynyń Jarlyǵymen ol Qazaqstannyń Egıpet Arab respýblıkasyndaǵy tótenshe jáne ókiletti elshisi bolyp taǵaıyndaldy.