Injenerlik-saperler bólimsheleri Arys qalasynyń ishki aýmaǵyn tazartý jumysyn aıaqtap, qoıma aýmaǵyn tazartýǵa kiristi. Sonymen qatar áskerı qalashyqty qalpyna keltirý jumystaryn jalǵastyrýda, dep habarlaıdy Qamshy.kz aqparat agenttigi.

Qorǵanys mınıstrligi baspasóz qyzmetiniń málimetinshe, apta saıynǵy sapar barysynda qorǵanys vedomstvasynyń basshysy qoımany sapaly tazartý, sondaı-aq jergilikti halyqtyń qaýipsizdigin qamtamasyz etý birinshi deńgeıdegi mańyzdy mindet ekenin eskere otyryp, qalany jóndeý jumystaryn tekserdi jáne is-sharany atqarý nátıjeleri týraly baıandamalardy tyńdady. Sapar qorytyndysy boıynsha Qorǵanys mınıstri ár qaraı qalpyna keltirý jáne joıý jumystaryna qatysty birqatar tapsyrmalar berdi.

Arysta tótenshe jaǵdaıdyń saldaryn joıý jóninde qosalqy jasaqtyń áskerı qyzmetshileri jumysyn jalǵastyryp jatqanyn aıta ketken jón. Oq-dári bólshekterin izdeýge, tabýǵa jáne joıýǵa ınjenerlik-saperler toptary jiberildi. Osy aralyqta olar 150 myńnan astam qaldyqtardy tapty. Búgingi kúnge deıin saperler 1 250,7 sharshy km aýmaǵyn tolyq tazartty, salystyrmaly túrde bul aýmaq Sıngapýr memleketiniń eki aýmaǵyna teń bolady.

Jergilikti halyqpen oq-dári tabylatyn jerge shuǵyl jetetin mobıldi top jumys jasaıdy. Óz tarapynan Qorǵanys mınıstrligi taǵy da oq-dári bólshekterin nemese kúdikti zattardy tapqan jaǵdaıda tez arada saperler mobıldi tobyna habarlaýdy jáne óz betinshe eshqandaı is-áreket jasamaýdy eskertedi.