1992 jylǵy 23-maýsymda eli­mizde «QR ishki ister organdary týraly» zań qabyldandy. Bul Qa­zaqstan polısıasynyń qyzmetin aıqyndaǵan alǵashqy quqyqtyq qujat bolatyn. 2007 jyly Memleket basshysynyń Jarlyǵymen 23 maýsym Polısıa kúni dep res­mı túrde ataldy. Al, memlekettik qyzmetshiler kúnin atap ótý týraly Birikken Ulttar Uıymy  2002  jyly  qarar  qabyldady. Bizdiń elimizde  bul kún 2013 jyly mereke bolyp jarıalandy. «Qos meıramdy atap ótýdegi maqsat– qaýipsizdik pen tynyshtyq saq­shylaryn qoldaý, eńbekterin ba­ǵalap, laıyqty marapattaý jáne osy jolda qurban bolǵandardy eske alý» dedi oblystyq ishki ister departamentiniń bastyǵy Q.Dálbekov. – Elbasynyń polısıa qyz­metkerlerine arnaıy mereke belgileýi – bul biz úshin joǵary senim men úlken mártebe. İshki ister organdarynyń tarıhy – táýelsiz memleketimiz tarıhynyń bir bóligi. Sol jyldary tómen jalaqy, qyzmetkerlerdiń áleýmettik jaǵ­daılarynyń qarastyrylmaýy– kóp­­­tegen bilikti mamandardyń bas­qa salalarǵa ketip qalýlaryna ákeldi. Sondaı qıyndyqtarǵa qa­ra­mastan, keshegi mańǵystaýlyq polı­seıler – búgingi ardagerler óz mindetterin abyroımen atqara bildi. Qylmyspen  kúresip,  qoǵamdyq tártip ornatýda ter tókken olar búginde jas mamandardy tárbıeleýge atsalysýda,-dep ardagerlerge alǵys aıtty Qaırat Sultanbaıuly. Departament bastyǵynyń aı­týynsha, búginde jaǵdaı ózger­gen. Qoǵamdyq qaýipsizdikti qam­tamasyz etýshilerge úkimet tarapynan barlyq jaǵdaı jasalýda. Mekemeniń materıaldyq-tehnıkalyq negizi jaqsaryp, qyzmetkerler baspanamen qam­tamasyz etilýde. Aqtaý men Jańaózen qalalaryna qosymsha  100-den astam sońǵy úlgidegi burylmaly beınebaqylaý kame­ralary ornatylǵan. Sońǵy eki jylda arnaıy avtokólikter, ra­dıo­baılanys qurylǵylary men kompúterlik tehnıkalar ja­ńar­tylǵan. Aǵymdaǵy jyly Ja­ńaózende quqyq qorǵaýshylar­ǵa arnalǵan eki turǵyn úı turǵyzylyp, tabystalǵan.  Mań­ǵystaý  oblystyq ishki ister departamentinde  2 myńnan astam qyzmetker eńbek etedi. Qoǵamdyq tártip ornatyp, qylmyspen kú­resip, azamattardyń quqyqtaryn qorǵaýdy maqsat etken olardyń  basym kópshiligi óz isterin súıetin bilikti mamandar. Tártip joq, qylmys kóp elde turaqtylyq pen ekonomıkalyq damý da bolmaıtyny anyq. Sondyqtan da  polıseılerge júkteletin mindettiń salmaǵy aýyr. Osy oraıda, birqatar qyzmetkerler mereke  qurmetine  oraı  marapatqa ıe boldy. Beıneý aýdandyq ishki ister bólimi bastyǵynyń orynbasary Murat İzimov, Aqtaý qalasy  ishki ister bólimi jedel basqarý ortalyǵynyń aǵa ınspektory Asylbek  Sıyhov, ýaqytsha ustaý ızolátorynyń polıseıi Baýyrjan Elgeldıev jáne ishki ister departamenti emhanasynyń zerthanashysy Úzilhan  Búrkitovalar Qurmet  gramotalaryna  ıe bolsa, basqa da birqatar  qyzmetkerler  men ardagerler Alǵys hattarmen marapattaldy. Kesh sońy ónerpaz polıseıler men estrada juldyzdarynyń konsertine ulasty.