Qazaqstandaǵy bılik partıasy "Nur Otannyń" tóraǵasy, eldiń burynǵy prezıdenti  Nursultan Nazarbaev el astnasy Nur-Sultan qalasynda ótken partıanyń saıası keńesiniń keńeıtilgen otyrysynda partıanyń quramynda bar ekendikterin kórsetkisi kelmeıtin  ákimder men mınıstrlerdi synady dep jazady Qamshy.kz aqparat agenttigi. 

Nazarbaevtyń aıtýynsha, ""Nur Otan" partıasynyń barlyq múshesi jarıa túrde partıaǵa qatysy bar ekendigin pash etýi tıis".

"Munan da jamany keıbir memlekettik organdardyń basshylary, mınıstrler, ákimder ózin partıamen birge ekendigin kórsetkisi kelmeıdi. Partıa bylaı, men bylaı, ózime ózim osy jerde bastyqpyn. "Nur Otan"-nyń barlyq múshesi jarıa túrde partıaǵa qatysy bar ekendigin pash etýi tıis. Partıa tósbelgisin búgingi otyrysqa ǵana taǵyp kelmeý qajet. Mysaly, Malaızıada mınıstrler, premer-mınıstr, orynbasarlary, barlyǵy tósbelgi taǵyp júredi. Kóshede adamdar memlekettik qyzmetshi kele jatqanyn kóredi. Al biz she? Partıa múshesi ekendigimizden qorqamyz ba? Onda shyǵyńyzdar, basqasyn tańdap alamyz", - dedi bılik parıasynyń tóraǵasy. 

Sonymen qatar Nazarbaev maýsym aıynda Shymkent qalasynda ótken narazylyq kezinde "Nur Otannyń" týyn julyp tastaǵanda partıa músheleriniń sharasyzdyq tanytqanyn synǵa aldy. 

"Shymkentte partıanyń týyn julyp tastady. Bul oqıǵa ortalyq keńseniń aldynda boldy. Bireýi de lám-mım degen joq. Partıa qaıda qarady? Artynan bárin ornyna keltirýge týra keldi. Mine, bári osyndaıda baıqalady. Partıa, "Nur Otan" deımiz. Biraq typ-tynysh otyramyz. Bir nárseden qorqamyz ba?", - dedi Nazarbaev.

Eske sala keteıik, 24 maýsymda Túrkistan oblysy Arys qalasynda oq-dári saqtaıtyn qoıma jarylyp, qala turǵyndary Shymkentke evakýasıalanǵan bolatyn. 27 maýsymda Arys turǵyndary Shymkette mıtıń jasap, qala kóshelerimen júrip ótti. Sol kezde bir jas jigit "Nur Otan" partıasy ǵımaratynyń aldyndaǵy tuǵyrǵa minip, partıanyń týyn julyp tastamaq boldy.