"Áýlıe-Ata" halyqaralyq áýejaıynyń halyqaralyq áýe júk tasymaly salasyndaǵy áleýeti artpaq. Jýyrda atalǵan áýejaıǵa Mongolian Airlines áýe kompanıasynyń júk tasymaldaıtyn ushaǵy kelip qondy dep jazady Qamshy.kz aqparat agenttigi. 

Syıymdylyǵy 20 tonna bolatyn áýe kemesi «Áýlıe-Ata» áýejaıynyń bazasyna alynyp, jergilikti kásipkerlerdiń halyqaralyq júk tasymaly boıynsha tapsyrystaryn oryndamaq. Bul joba Mongolian Airlines pen SCAT áýe kompanıalary arasyndaǵy ózara kelisim negizinde júzege asyrylyp otyr.

Tarazdaǵy áýejaı bazasyna mońǵolıalyq áýe kompanıasynan júk tasymaldaýǵa arnalǵan ushaqty jalǵa alý óńirde iri áýe júk tasymaly habyn qurýdyń alǵysharty sanalady. Ári bul áýe reısi respýblıkanyń ońtústik aımaǵyndaǵy kásipkerlerdiń de tapsyrysyn oryndaý qabiletine ıe.

– Bul áýe reısi ońtústik óńirlerdegi aýyl sharýashylyǵy taýaryn óndirýshilerdiń ónimderin álemniń kez kelgen núktesine jetkizý boıynsha tapsyrystardy oryndaıdy. Sáıkesinshe tapsyrysqa saı shetelderden ımporttyq taýarlar da tasymaldanatyn bolatyn. Jergilikti kásipkerlermen júrgizilgen kelissózderge saı birer kúnde júk ushaǵy sýytylǵan et ónimderin Iran, Irak, Kýveıt elderine alyp ushpaq. Aldaǵy ýaqytta tapsyrystar boıynsha júk áýe reısiniń «Áýlıe-Ata» halyqaralyq áýejaıynan ushyp shyǵýdyń naqty kestesi túziledi,–deıdi «Áýlıe-Ata» halyqaralyq áýejaıy aksıonerlik qoǵamynyń basqarma tóraǵasy Dáýlet Hamzın.

Al Mongolian Airlines áýe kompanıasynyń bas dırektory Horansýren Chınbad bıylǵy jyldyń Qazaqstan-Mońǵolıa arasyndaǵy áýe tasymal salasy úshin jemisti bolǵanyn tilge tıek etti.

–Bıylǵa deıin Nur-Sultan men Ulan Batyr arasynda tikeleı áýe reısi bolmaǵan. Aınalma joldyń esebinen ushaqpen eki qala arasyna jol júrý uzaqtyǵy 9 saǵat bolatyn. Al bıyl jańadan ashylǵan Nur-Sultan-Ulan Batyr áýe reısi bul joldy 3,5 saǵatqa deıin qysqartty. Endi júk tasymaly salasynda SCAT áýe kompanıasymen aýqymdy jobany qolǵa alyp otyrmyz,– dedi Horansýren Chınbad.

Aıta ketý kerek «Áýlıe-Ata» halyqaralyq áýejaıy júk tasymaldaýǵa arnalǵan ushaqty Mongolian Airlines kompanıasynan jalǵa alady. Buǵan deıin mundaı tapsyrystardy oryndaýda áýejaı ırandyq áýe kompanıalarǵa ıek artyp kelgen.