Qalalyq ákimdikte jumys tobymen jáne bilim bóliminiń, densaýlyq saqtaý, jumyspen qamtý jáne áleýmettik baǵdarlamalar bóliminiń , mádenıet jáne tilderdi damytý, sport basqarmasynyń, polısıa jónindegi komısıanyń, kámeletke tolmaǵandardyń isteri jáne olardyń quqyqtaryn qorǵaý basshylarynyń qatysýymen kezdesý ótti.

– "Nur Otan" partıasy "Baqytty otbasy"jobasyn júzege asyrýda.   Biz tórt arnaıy top Semeıge  keldik. Ádette sapar kezinde 70-ke jýyq obekti, 13-ke jýyq aýdan men aýyl qaralady. Jumys barysynda barlyq júıeni, onyń tıimdiligin, sapasyn, eń bastysy-balalardyń quqyqtaryn qorǵaý jáne otbasyndaǵy jumys boıynsha nátıjelilikti zertteımiz. Otbasy balanyń ál-aýqatynyń negizi bolyp tabylady. Sondyqtan jergilikti atqarýshy organdardyń ár túrli sanattaǵy otbasylarǵa kómek berýin basty nazarda ustaısyz, – dedi "Nur Otan" partıasy janyndaǵy balalardyń quqyqtaryn qorǵaý keńesi tóraǵasynyń orynbasary Dınara Zakıeva. – "Baqytty otbasy" jol kartasynda otbasyn qoldaý júıesin qurýdyń keń aýqymy qarastyrylǵan.

Kámeletke tolmaǵandar arasyndaǵy sýısıdtik minez-qulyq máselesi ózekti jáne  nazar aýdarýdy qajet etedi. Jaǵdaıdy jaqsartý jáne vedomstvoaralyq ózara is-qımyldy kúsheıtý úshin barlyq qalalar men aýdandarda qala jáne aýdan ákimderi orynbasarlarynyń tóraǵalyǵymen jedel jumys toptary quryldy. Olar aldyn alý jumystaryn júrgizip, jasalǵan sýısıdterdiń sebepteri men faktorlaryn anyqtaıdy. Sýısıdtiń, kámeletke tolmaǵandar arasyndaǵy quqyq buzýshylyqtardyń jáne balalarǵa qatysty zorlyq-zombylyqtyń aldyn alý boıynsha keshendi is-sharalar jospary jasaldy.

Bilim berý mekemeleriniń bazasynda 1 qyrkúıekten bastap "Baqytty otbasy" partıalyq jobasy aıasynda "Sanaly ata-ana" kýrsy ashylady.

Semeıde jumys toby qalalyq aýrýhanaǵa, №8 balalar úıine, kámeletke tolmaǵandardy beıimdeý ortalyǵyna, balalar úıine, sańyraý (estimeıtin) balalarǵa arnalǵan mektep-ınternatqa áleýmettik qyzmet kórsetetin mekemelerge bardy.