Jaqsylyq pen qaıyrymdylyq jasaýǵa beıim turatyn, júreginiń jylýy mol azamatttardyń demeýi men qoldaýynyń arqasynda respýblıkalyq «Mektepke jol» aksıasy aıasynda Jambyl oblysynda birneshe otbasynyń balalary qýanyshqa keneldi. Atap aıtqanda, «Nur Otan» partıasy Baızaq aýdandyq fılıaly jáne aýdan ákimdigi bilim bóliminiń uıytqy bolýymen qaıyrymdylyq sharasy uıymdastyryldy dep jazady Qamshy.kz aqparat agenttigi. 

Partıanyń «Baqytty otbasy», «Baqytty balalyq shaq» jáne «Kedergisiz keleshek» jobalaryn iske asyrý maqsatynda aýdanymyzdaǵy kópbalaly jáne az qamtylǵan otbasy balalaryna «Mektepke jol» aksıasy aıasynda alǵashynda 50 balaǵa, beısenbi kúni ótken sharada 30 balaǵa aýdandyq máslıhattaǵy depýtattyq fraksıa músheleriniń demeýshiligimen sómke jáne mektepke qajetti oqý quraldary tabystaldy.

«Júrekten - júrekke» atty qaıyrymdylyq sharasynda aýdan ákiminiń orynbasary Dáýir Dáýletov, bilim bóliminiń basshysy Nurjan Nuralıev, “Nur Otan” partıasy aýdandyq fılıaly tóraǵasynyń birinshi orynbasary Sholpan Baıtaqova sóz alyp, elimiz boıynsha ótip jatqan «Mektepke jol» aksıasynyń mańyzdylyǵyna toqtaldy. Jas óskinderge qýanysh syılaýdyń ózi baqyt ekendigin, aldaǵy ýaqytta da qamqorlyq kórsetile beretindigin aıtyp, jyly lebizderin bildirdi.

Ata – analar márt azamattardyń óz balalaryna tıgizgen kómegine alǵystaryn aıtty.

Aıta keteıik, QR Bilim jáne ǵylym mınıstrligi bıyl «Mektepke jol» respýblıkalyq qaıyrymdylyq aksıasy boıynsha qosymsha sharalar qabyldap, aksıa 2008 jyldan beri jyl saıyn elimizdiń barlyq óńirlerinde ótkizilip keledi.

Bıyl aksıa bir aı erte, ıaǵnı 1 shildeden bastaldy. Kómekke muqtaj balalardy barynsha qamtý maqsatynda jyljymaly pýnktter, sondaı-aq eriktilerdi tartýmen mobıldi toptar uıymdastyryldy.

Jalpy, bıyl oblys boıynsha «Mektepke jol» qaıyrymdylyq aksıasy aıasynda kóp balaly jáne áleýmettik az qamtylǵan otbasydan shyqqan 30 myńǵa jýyq oqýshyǵa kómek kórsetiledi.

Igi dástúrge aınalǵan «Mektepke jol» qaıyrymdylyq aksıasy 30 qyrkúıekke deıin jalǵasady. Osy jyly alǵash ret "Meniń Atamekenim" portalynda "Mektepke jol" platformasy iske qosyldy. Atalǵa saıt kóp balaly jáne az qamtylǵan otbasylardan ótinishterdi jyl boıy qabyldaıdy.