"Nur-Otan" partıasy qaıta jańǵyrý prosesine daıyn emes. Oǵan eshqandaı da alǵy sharttar joq. Al ákimshilik-ámirlik pármenmen, buıryq-nusqaýmen ondaı sharýalar júzege asyrylmaıdy" – deıdi jýrnalıs Muhtar Túmenbaı óziniń  feısbýktaǵy paraqshasynda .

1) Partıanyń paıda bolý tabıǵatynyń ózi teris. Esterińizde bolsa "Nur-Otan" bılikke tartysty kúrestiń arqasynda kelgen joq. Ony uıymdastyrýshylar partıa qurmastan buryn-aq bılik basynda bolǵan. Al dıalektıka zańynda bári kerisinshe bolýy tıis. Aldymen partıa qurylady, sodan soń ol partıa tartys báseke negizinde bılikke jetedi. Shynaıy kúreste shynyqpaǵan partıa eshqashan da ómirsheń bolmaıdy. Bul da dıalektıka.

2) 20 jyldan astam ýaqyt ishinde bul partıanyń birde-bir básekege qabiletti sparıng partnery bolǵan joq. Saıası alańda jalǵyz ózi dop teýip, ózimen-ózi oınap júrgeni sol. Al konkýrensıa joq jerde damý qaıdan bolsyn!

3) Partıa jumysy vertıkaldy basqarý negizinde qurylǵan. Basshy ne aıtty – sol zań. Aýdandyq partıa fılıalynda aýdan ákimi, qalada qala ákimi, oblysta oblys ákimi, ortalyq apparatta Elbasy jetekshi. Mundaı formatta pikir plúralızmi bolmaıtyny anyq. Árıne, "Men basshymyn, al sen aqymaqsyń" degen ortada pikirtalas atymen bolmasy belgili. Al pikirtalas joqta jańa, tyń ıdeıalar týmaıdy.

4) Bul partıa el ishinde qolaıly saıası-áleýmettik ahýal qalyptasýynyń negizinde paıda bolǵan joq. Ol tek demokratıalyq elderdiń yqpalynyń nátıjesinde iske qosylǵan format. Ol kezde halyq ta partıalyq júıege daıyn emes edi. Al keıin es jıyp, tájirıbe jınaqtaǵanda opozısıalyq partıalardyń damýyna shekteý qoıyldy. Sóıtip "Nur-Otan" saıası alańda qaıtadan jalǵyz ózi qaldy. Bıliktiń batasymen qurylǵan Aq jol, Aýyl, Rýhanıat sıaqty oıynshyq partıalardy esepke alýdyń ózi qısynsyz.

5) Búgingi tańǵa deıin paramen ustalǵan, sybaılastyq jemqorlyqqa jol bergen memlekettik qyzmetkerlerdiń 100% "Nur-Otan" músheleri. Olardyń sany búginde myńdap sanalady. Munyń ózi partıanyń avtorıtetine orny tolmas nuqsan keltirdi. Al osy ýaqyt ishinde el aldyna shyǵyp sol paramen ustalǵandardy aıyptap sókken tym quryǵanda bir aımaqtyq partıa basshysyn kórdińizder me. Bular partıa atyna kir keltirdi dep, attaryn atap, tústerin tústegen, mundaılarmen bizdiń jolymyz birge emes dep joǵarǵy minberlerden sóılegen bireýi boldy ma? Joq. Bolǵan joq. Bul da, joǵaryda aıtyp ketken vertıkaldy basqarý júıesiniń saldary. Birde bir partıa fýnksıoneri joǵary jaqtyń ruqsatynsyz bireýdi synamaq túgili jaq ashpaıdy. Al negizinde, óz abyroıyn oılaǵan kez kelgen saıası uıym árbir osyndaı fakti boıynsha málimdeme jasap, óz pozısıasyn bildirip otyrady jáne mundaı jaǵdaılardy boldyrmaýdyń amaldaryn izdeıdi. "Nur-Otanda" ondaı praktıka atymen joq. Demek partıada uıymnyń abyroıyna nuqsan keletin ınfeksıalardan emdeletin ımýnıtet qalyptaspaǵan. Halyq arasynda partıanyń bedeliniń bolmaýy – sonyń jemisi.

6) "Nur-Otan" jańa lıderlerdi ósirip baptap, tárbıelep shyǵara almaıtyn dárejege jetti. Onyń da sebebi jańaǵy vertıkaldyq basqarý júıesinde jatyr. Alǵashqy partıalyq uıymdarda bedel jınap, halyqpen qoıan-qoltyq jumys istep shynyqqan, sol part. ıacheıkanyń usynysymen, aımaqtyq saılaý arqyly ósip, ortalyq organǵa deıin jetken bir atqaminerdi kórsetińizdershi. Joq ondaılar. Sebebi barlyq basshy fýnksıonerler joǵarydan taǵaıyndalady. Nemese halyqqa syıly-aý degenderdi aldap-sýlap, taqa bolmasa kúshtep partıaǵa kirgizedi. Biraq olardan da paıda shamaly. Sebebi ol rekrýttar óz isiniń tamasha mamany bolǵanymen, partıalyq sharýada nól. Golovkın men Sapıevyń da sol, Dımashyń men Qaıratyń da sondaı. Al kadr saıasatynda mundaı tapshylyqqa dýshar bolǵan uıymnyń bolashaǵy qandaı bolmaq? Jaýabyn men aıtpasam da túsinip otyrǵan shyǵarsyzdar.

Qysqasy "Nur-Otan" partıasy qaıta jańǵyrý prosesine daıyn emes. Oǵan eshqandaı da alǵy sharttar joq. Al ákimshilik-ámirlik pármenmen, buıryq-nusqaýmen ondaı sharýalar júzege asyrylmaıdy.