27 tamyzda Atyraýda Atyraý oblysy ákimi Nurlan Noǵaevtyń tóraǵalyǵymen «Nur Otan» partıasy oblystyq fılıalynyń Saıası keńesi búrosynyń otyrysy ótti, – dep habarlaıdy Qamshy.kz aqparat agenttigi Atyraý oblysynyń óńirlik komýnıkasıalar qyzmetine silteme jasap.

21 tamyzda Qazaqstannyń tuńǵysh Prezıdenti – Elbasy Nursultan Nazarbaevtyń tóraǵalyǵymen elimizdiń astanasynda partıanyń Saıası keńesiniń keńeıtilgen otyrysy ótip, partıanyń saılaýaldy baǵdarlamasynyń júzege asý barysy men sıezerde berilgen tapsyrmalardyń oryndalysy talqylandy.

– Óz sózinde Elbasy partıany júıeli qaıta júkteý baǵdarlamasyn usyndy. Elbasy partıanyń belsendi múshelerin toptastyrýdy, barlyq deńgeıdegi partıa organdarynyń áleýetin meılinshe júzege asyrýdy, partıalyq jaýapkershilikti kúsheıtýdi tapsyrdy, – dedi N.Noǵaev.

Óńir basshysy atap ótkendeı, partıaǵa degen senimdi arttyrý úshin barlyq qoıylǵan mindetter men berilgen ýádeler oryndalýy kerek. Bul maqsatqa qol jetkizýde barlyq partıa músheleri qajyrly eńbek etýi tıis – fraksıalardyń, bastaýysh uıymdardyń basshylary, depýtattar, memlekettik organdardyń ókilderi.

Partıanyń oblystyq fılıaly tóraǵasynyń orynbasary Baqbergen Qarabaev azamattardyń áleýmettik ál-aýqatyn jaqsartý jónindegi memlekettik baǵdarlamalardy oryndaý baǵytynda júrgizilip jatqan jumystar týraly baıandady.

Partıanyń aldynda turǵan mindet – korrýpsıanyń aldyn alý boıynsha jumysty kúsheıtý, aqparattyq strategıany túbegeıli qaıta qaraý, ıdeologıalyq jumysty kúsheıtý. Buny óńirdiń Qoǵamdyq keńesiniń tóraǵasy Murat Óteshev atap ótti. 

– Áleýmettik jelilerde, azamattardy jeke qabyldaýda keıde bizdiń atymyzǵa syn aıtylyp jatady. Memlekettiń mindeti – adamnyń bar múmkindigin júzege asyrýyna jaǵdaı jasaý, onyń damýyna yqpal etý. Basqasynyń barlyǵyna ol óziniń bilimimen, biligimen, kúsh-jigerimen qol jetkizýi tıis. Óńirimizde jumysqa ornalasýǵa múmkindik jetkilikti, óz isin ashý úshin túrli baǵdarlamalar bar. Talpynǵan adamǵa árdaıym jumys tabylady. Eń bastysy – basqaǵa ıek artýdan, memleketke degen tutynýshylyq kózqarastan arylý qajet, – dep atap aıtty Nurlan Noǵaev. 

Bul baǵyttaǵy problemalyq másele – birqatar azamattar bireýge ıek artýǵa daǵdylanyp qalǵan. Otyrysta aıtylǵandaı, memleket shyn máninde muqtaj bolyp otyrǵandarǵa ǵana kómektesýi kerek.

Kóp balaly jáne az qamtylǵan otbasylaryn qoldaýdyń tıimdi quraly bir rettik kómek emes, jumysqa ornalastyrý, oqytý jáne qaıta oqytý, óz isin ashý úshin nesıeleý sıaqty sharalar bolýy tıis. Búginde oblysta 6,5 myń otbasy (36 myń adam) adresti áleýmettik kómek alady. Buǵan 1,9 mlrd teńge bólinip otyr. Osydan bir jyl buryn kómek alýshylardyń sany 2,2 myń otbasyn qurap, oǵan qajet qarajat 500 mln. teńgeden aspaıtyn edi. 

– Bul qýantarlyq kórsetkish emes. Keıde járdemaqy alý úshin tabystaryn jasyryp, semálaryn buzatyn faktiler de kezdesip jatady. Alaıda, olardyń barlyǵy muqtaj adamdar emes. Sondaı-aq, eger adam tek joǵarydan kómek bolady dep úırenip ketse, ol eshnársege talpynbaı, aǵymmen júre beredi. Tek eńbekqorlyqtyń arqasynda ǵana adam tabysqa qol jetkizedi. Osyny jastardyń sanasyna sińirýimiz qajet. Erteń qyzmet etip, memlekettiń ıgiligin jasaıtyn solar. Búgingi tańda partıanyń aldynda turǵan mindet – barlyq áleýmettik jáne ekonomıkalyq máselelerdi qamtı otyryp, memleketimizdiń bastamalaryn ilgeriletý, qoǵamnyń belsendi toptary men jastardy tarta otyryp, partıalyq jobalardy iske asyrý. Alda úlken mindetter tur, biz solardy birlesip oryndaýǵa tıistimiz, – dep qorytyndylady Nurlan Noǵaev.