Jambyl oblysynda «Taraz Gid» ataýymen jastar týrısik slety ótti. Jambyl orblysy ákimdiginiń Týrızm basqarmasy bastamashy bolǵan sharaǵa «Taraz-Týrızm» týrısik aqparattyq ortalyǵy men Taraz qalalyq jastar resýrstyq ortalyǵy, «Jambyl oblysynyń álpınızm, radıobaǵdarlaý jáne sporttyq týrızm federasıasy» qoǵamdyq birlestigi, «Otan I.» týroperator qoldaý bildirdi.
Shara Jambyl oblysy men Taraz qalasynda ishki jastar týrızmin damytý, biryńǵaı týrısik jastar klýbyn qurý, avtorlyq týrlardy «TripAdvisor», «Indy-Guide», «Viator» «Private Guide» syndy halyqaralyq týrısik platformalarda damytý, Týrızm sarapshylarynyń ózara aqparat jáne tájirıbe almasýy jáne jastardy týrızm salasyndaǵy kásipkerlikke baýlý jáne yntalandyrýdy maqsat etti.
Jastar sletyna aımaqtaǵy joǵary oqý oryndarynyń jáne oblys kolejderiniń stýdentteri qatysty. Sonymen birge, elimizdiń ár aımaǵynan kelgen ekskýrsavodtar, shetel saıahatshylary men blogerleri, sondaı-aq memlekettik mekeme qyzmetkerleri men el jáne alys-jaqyn sheteldiń túrli týrısik mekemeleri atsalysty.
Eki kúnge sozylǵan týrısik slettyń alǵashqy bóligi Taraz qalasyndaǵy Shoqan Ýálıhanov atyndaǵy oblystyq ǵylymı-ámbebap kitaphanasynyń Kovorgıng zalynda ótti. Munda Jambyl oblysy ákimdigi týrızm basqarmasynyń basshysy Qarlyǵash Aralbekova forýmdy saltanatty ashyp, qonaqtardy oblystaǵy týrızm salasynyń áleýetimen tanystyrdy.
Jıynda el jáne shetel saıahatshylary óz oılarymen bólisip, týrızmdi damytý turǵysyndaǵy usynystaryn ortaǵa saldy. Atap aıtqanda, «Taraz Týrızm» mekemesiniń dırektory U. Joldyqululy Taraz qalasyndaǵy týrısik marshrýttardy tanystyrsa, Fransıadan arnaıy kelgen saıahatshylar Áýlıeata aımaǵyn aralaýda alǵan áserlerimen bólisip, óz oılaryn ortaǵa saldy.
Qatysýshylar shara sońynda ortaǵasyrlyq Tórtkúl kerýen saraıyn aralap, qazaq halqynyń dástúri men ulttyq taǵam, ulttyq sport syndy qundylyqtarynan habardar boldy.
Slettyń ekinshi kúni qatysýshylarekologıalyq týr ótkizdi. Jýaly aýdanynda ornalasqan Berikqara shatqalyna attanǵan stýdentter aldymen taýly jerdegi qaýipsizdik tehnıkasymen tanysty. Odan soń taýǵa órmeleýdiń praktıkalyq jattyǵýlaryna kiristi. Qatysýshylar shópti shatqaldarmen júrý tehnıkasyn da meńgerip, taýly jerdi baǵdarlaýdan da sabaqtar aldy. Shara sońynda barlyq qatysýshylar sertıfıkattarmen marapattaldy.
