Qalaısyzdar, dostarym? Demalys qalaı ótip jatyr?

Al meniń demalysymnyń bir kúni bos ótken joq. Bos ótpedi degenim ne táıiri, júdegen janymdy jadyratyp qaıttym. Júregime úńilip keldim. Ótkenim men keleshegim kóz aldymda kólbeńdep, óz-ózimnen býlyǵyp jylaǵym kelgeni-aı... Nege ekenin...

Bárine sebepker – gıtarasyn asynǵan sol bir buıra shashty súıkimdi kelinshek... Maqpal Jumabaı.

Maqpaldyń maqamdy jyrlary týraly kóp esitsem de, óz aýzynan tyńdaǵanda ánniń ózgeshe óń alatynyn bilippin be?.. Tula boıdy ıitip, eljiretip, býyn-býynyńda júgiretin osynsha erekshe, osynsha tunyq saz da bolady eken-aý...

«Men ánshi emespin, men – aqynmyn. Aldymen óleń týǵan soń, artynan óz-ózinen kókirekke óleńniń sazy kelip, úıirile qalady. Qaı-qaı aqynymyzdyń bolmasyn, óleńi aýyzdan-aýyzǵa ánmen jetken. Berirektegi Jambyl aqyndy alyńyz. Ol da dombyrasymen óleń aıtqan. Men sol aqyndardyń synyǵymyn», – dep sózin bastaǵan Maqpal aqyn aınalasyna óleń men sazdyń qadirin túsinetin qaýymdy jınap, sazymen sýsyndatýdy dástúrge aınaldyrǵan. 

 Iá, siz de janarlardan muń kórip turǵan shyǵarsyz?.. Ol – móldir muń... Maqpaldyń maqamdy jyrlary týdyrǵan maqpal muń...

Ol sóıledi búgin. Muńdy aıtam. Júrekten shyǵyp, júrekke jetti... 

Kirpigime ilingen kúnniń bárin ózińe. Kókirekti kernegen muńnyń bárin ózińe. O, alystan munartqan shyńnyń bárin ózińe. Óleńge de aıtpaıtyn syrdyń bárin ózińe Saqtap qoıamyn…

Ózim ǵana senetin shyndyǵymdy ózińe. Ózim ǵana súretin tirligimdi ózińe. Ózim ǵana estıtin kúmbirimdi ózińe. Moıyndaǵym kelmeıtin sumdyǵymdy ózińe Saqtap qoıamyn…

Meıirimmen qaraǵan kózdiń bárin ózińe. Anam aıtqan aıaýly sózdiń bárin ózińe. Taǵdyrymdy sel etken tezdiń bárin ózińe. Ótti deýge qımaıtyn kezdiń bárin ózińe Saqtap qoıamyn…

Úzileıin dep turǵan tózimimdi ózińe. Aldanbaýǵa úıretken sezigimdi ózińe. Meni Jerde bar etken sezimimdi ózińe. Meni túbi óltirer sol sezimdi ózińe Saqtap qoıamyn…

Qasiretti hám sulý zamanymdy ózińe. Keń dalamda jańǵyrǵan azaly úndi ózińe. Mólt-mólt etip jas tunǵan janarymdy ózińe. Jylap turyp súıetin qazaǵymdy ózińe Saqtap qoıamyn… Qara jáshik…

– dep óleńdetken Maqpal aqyn maqamdy jyrlaryn búgin ár júrekke saqtap qoıdy...

Meıirgúl Ońǵarova