30 qyrkúıek kúni Almaty qalasyndaǵy  "Respýblıka saraıynda" saǵat 19:00-de "Otan otbasynan bastalady" atty tuńǵysh otbasylyq aqyndar aıtysy ótedi dep jazady Qamshy.kz aqparat agenttigi. Bul týraly Aıtys aqyndary men jyrshy-termeshilerdiń halyqaralyq odaǵy habarlady. 

Odaqtyń habarlaýynsha, bul aıtys bıliktegi "Nur Otan partıasynyń qoldaýymen Qazaqstannyń eks-prezıdenti Nursultan Nazarbaevtyń "Bolashaqqa baǵdar: rýhanı jańǵyrý" atty maqalasy aıasynda ótpek.

"Elbasynyń rýhanı jańǵyrý maqalasy aıasynda ótetin jyr saıysynyń maqsaty- ulttyq qundylyqtardy ulyqtap, tól ónerimizdiń órken jaıǵany sonsha, bir otbasynan birneshe myqty aıtysker shyǵyp otyrǵanyn dáripteý. Bul dodada Egeýhan Muqamádıqyzy nemeresi Ardagereı Kápulymen,  Bekarys Shoıbekov inisi Dáýrenmen, Rústem Qaıyrtaıuly ákesi Qaıyrtaımen, Iranǵaıyp Kúzembaev aǵasy Talǵatpen, Dıdar Qamıev inisi Ulanǵasyrmen, Erjan Ámirov inisi  Bekjanmen, Amangeldi Panaberdıev  aǵasy Serikbolmen  aıtysady. Keshtiń arnaıy qonaǵy Tóraǵalı Tóráli.

Otbasyndaǵy tárbıe, ata men ananyń úlgisi, syılastyq pen jarasym, aýyl men qala turmysyndaǵy erekshelikter, naryq zamanyna beıimdelýdiń kórinisteri, bala tárbıesi, jańa, jas urpaqqa bilim berýdiń ózekti máseleleri sekildi irgeli taqyryptar aıtys ózegine aınalady. Tapqyrlyq, utqyrlyq, kórkemdilik, sýyryp salý – aıtysty baǵalaýdaǵy basty talaptary. Aıtystyń bas bemeýshisi – "Nur Otan" partıasy. Aqparattyq qoldaý kórsetýshi  - "Qazaqstan" ulttyq arnasy. Aıtys Almaty qalasynda 30 qyrkúıek kúni «Respýblıka saraıynda» saǵat 19:00-de bastalady. Bıletter Almaty qalasyndaǵy barlyq kasalarda satylady", - delingen odaqtyń habarlamasynda.