Elbasynyń «Uly dalanyń jeti qyry» atty maqalasynda ata-babalarymyzdyń erteden tehnıkalyq progrestiń bel ortasynan tabylyp, órkenıetke óz úlesin qosqandyǵy aıtyldy. Babadan urpaqqa jetken osynaý bir qundylyq ulttyq sport túrleri sanalady. Al olardy zaman aǵymyna saı jetildirý ýaqyt talaby. Osy oraıda, M.H. Dýlatı atyndaǵy Taraz memlekettik ýnıversıtetiniń dosentteri asyq atý oıynynyń «ÚshBas» dep atalatyn túrin oılap taýyp, ony nasıhattaýda, dep jazady Qamshy.kz aqparat agenttigi. 

M.H. Dýlatı atyndaǵy Taraz memlekettik ýnıversıtetiniń «Dene shynyqtyrý jáne sport» kafedrasynyń dosentteri Bekbolat Amanjoluly, Jambyl Elemesuly, Darhan İztileýuly oılap tapqan oıyn asyq atý sportynyń jańǵyrtylǵan nusqasy sanalady. Oıynnyń eń basty ereksheligi ony jyl on eki aı boıy oınatýǵa bolatyndyǵynda bolyp otyr. Ol úshin 12 qoı asyǵy, 3 qyzyl tústi saqa jáne jeńil taqtaısha qajet. «ÚshBas» oıynynyń erejesinde ony jas erekshelikterine baılanysty birneshe topqa bólip oınatý qarastyrylǵan. Máselen 6-10 jas aralyǵyndaǵy búldirshinder asyqty 1 metr jerden kózdeýge tıis bolsa, 11-16 jastaǵy jasóspirimder úshin bul meje 2 metr dep bekitilgen. 17 jastan asqan oıynshylar «ÚshBastan» úzdik shyǵýy úshin asyqty 3 metr qashyqtyqtan atyp túsirýi kerek. Oıynshylar bir oıynda 3 atys jasaýǵa ruqsat berilgen. Olar saqalaryn qaz qatar tigilgen 12 asyqqa qaraı baǵyttaı atady. Jeńimpaz ózine berilgen 3 múmkindikti múlt jibermeı torǵa asyqty kóp túsirgen oıynshy atanady.

«ÚshBas» oıyny oıynnyń belsendi túrine jatqyzylady. Óıtkeni munda jeńiske jetý úshin júgirýge, sekirýge, nysany kózdeýge týra keledi. Qazirgi tańda jastar arasynda keń taraǵan bılárd oıyny sekildi «ÚshBas» oıynynyń ulttyq sport túrin jastar arasynda keń tanymal etetindigine kúmán joq. Ári mundaǵy basty nazar jastardyń qur asyq oıynyna qushtarlyǵyn arttyrý emes. Sol arqyly ulttyq qundylyqtardy dáripteý ekenin aıta ketken jón.

Búginde oblys aýmaǵynda oblystyq, qalalyq, aýdandyq deńgeıde «ÚshBas» oıynynan saıystar uıymdastyrylyp turady.