Ortalyq komýnıkasıalar qyzmetinde Nur-Sultan, Almaty men Shymkent qalalarynda jastarǵa beriletin jaldamaly páter baǵdarlamasyna qalaı qatysýǵa bolatyndyǵy aıtyldy, dep habarlaıdy Qamshy.kz aqparat agenttigi QazAqparatqa  silteme jasap.

"Elbasynyń tapsyrmasyna sáıkes, Nur-Sultan, Shymkent jáne Almaty qalalarynda keminde 1 myń jaldamaly páter salý sharalary qabyldanǵan. Keıin bul tapsyrma keńeıtilip, jastarǵa úsh qalada úsh myń páterge deıin salý jóninde tapsyrma berilgen bolatyn. Erejege sáıkes, birinshi kezekte 29 jasqa deıingi jas jigit nemese boıjetken resmı túrde Nur-Sultan, Almaty nemese Shymkent qalasynyń turǵyny bolýy tıis. Sondaı-aq, erejege sáıkes, jas adamnyń turaqty jumys oryny bolýy jáne jyljymaıtyn múlki bolmaýy kerek. Sebebi, biz jastarǵa óz turǵyn úıin satyp alý úshin bastapqy jarna jınaýǵa múmkindik berýimiz kerek", – dedi QR Aqparat jáne qoǵamdyq damý mınıstrligi Jastar jáne otbasy isteri komıtetiniń tóraǵasy Madıar Qojahmet.

Komıtet tóraǵasynyń aıtýynsha, budan bólek úmitkerdiń bankte shoty bolýy tıis.

"Óıtkeni, onyń bastapqy jarnany jınaýǵa qyzyǵýshylyǵy bolýy qajet. Sonymen qatar, bul jobanyń maqsaty – jastarǵa óz turǵyn úıin alýǵa múmkindik berý. Úmitkerdiń qyzmettegi jetistikteri boıynsha tıisti kýálikterin rastaıtyn qujattaryn kórsetse qosymsha taǵy jeńildikter beriledi. Sonymen qatar, ótinish berýshiniń otbasy jáne balalary bolǵan jaǵdaıda qosymsha jeńildikter qarastyrylǵan", – dedi ol Ortalyq komýnıkasıalar qyzmetinde ótken baspasóz máslıhatynda.

Madıar Qojahmettiń aıtýynsha, jumys isteıtin jastarǵa arnalǵan jalǵa beriletin turǵyn úı baǵdarlamasy 2021 jylǵa deıin jumys isteıdi.

"Statısıkalyq málimetterge súıensek, Qazaqstanda 29 jasqa deıingi 4 mln-ǵa jýyq jastar bar. Onyń ishinde 245 myńy Nur-Sultan qalasynda, 700 myńy Almatyda, 260 myńy Shymkent qalasynda turady. Tapsyrmaǵa sáıkes, osy úsh qalada keminde 3 myń páter tapsyrylady. Jyl saıyn úsh myń páter tapsyrylatyn bolsa, onda osy jýyq arada árbir qalada 9 myń páter tapsyrylýy tıis degen oıdamyz. Bul páterdi jalǵa berý merzimi bes jyl dep belgilenip otyr. Bul maqsatta búdjetten 21 mlrd teńge bólinip, úsh qalaǵa aýdarylǵan. Jergilikti atqarýshy organdar qazirgi tańda úı satyp alý máselesin qolǵa alyp jatyr", – dedi Madıar Qojahmet.

Jalǵa beriletin úıler jastarǵa satyp alý quqyǵysyz beriledi. Jalǵa berý baǵasy aıyna 10-12 myń teńge kóleminde bolady.

Jastarǵa arnalǵan páterlerle qujat qabyldaný bastalǵany týraly ákimdikterdiń saıtynda habarlama jarıalanady.

Sputniknews.kz  saıtynyń jazýynsha baǵdarlamaǵa qatysý úshin tómendegideı qujattar qajet:

1. Arnaıy úlgi boıynsha jazylǵan ótinish;
2. Ótinish berýshiniń jeke basyn kýálandyratyn qujattyń kóshirmesi (túpnusqa jeke basyn sáıkestendirý úshin usynylady);
3. Bilimi týraly qujattyń kóshirmesi;
4. Neke qıý týraly kýáliktiń kóshirmesi (bar bolsa);
5. Balalardyń týý týraly kýáliginiń (teriniń) kóshirmesi (bar bolsa);
6. Ótinish berýshige jáne otbasynyń barlyq múshelerine jyljymaıtyn múliktiń joq (bar) ekendigi týraly anyqtama;
7. Jumys ornynan anyqtama;
8. Ótinish berýshiniń aı saıynǵy tabysyn keminde 40 (qyryq) aılyq eseptik kórsetkish mólsherinde rastaıtyn sońǵy alty aı ishindegi tabysy týraly anyqtama;
9. Qazaqstan Respýblıkasy Eńbek kodeksiniń 35-babyna sáıkes eńbek ótilin rastaıtyn qujattar;
10. Banktik shottyń bolýy jáne nómiri týraly anyqtama jáne banktik shot boıynsha aqshanyń qaldyǵy jáne qozǵalysy týraly úzindi;
11. Ótinish berýshiniń túrli qyzmet salalaryndaǵy jeke jetistikterin rastaıtyn qujattar (bar bolsa).

Qujatty qabyldaý aıaqtalǵannan keıin ýákiletti organ 5 jumys kúni ishinde barlyq qujatty tekseredi. Ótinish berýshi tizbege sáıkes qujattar paketin tolyq usynbasa, oǵan taǵy 1 jumys kúni beriledi. Osy ýaqyttyń ishinde jetispeı turǵan qujattardy usyný qajet.

Al ótinish berýshi talapqa saı bolmasa, ýákiletti organ satyp alý quqyǵynsyz jalǵa beriletin páterdi berýden jazbasha túrde bas tartady. Osydan keıin 10 jumys kúni ishinde bal esepteıdi de, upaı sany boıynsha úmitkerlerdiń tizimin jasaıdy.

Esepteý baldyq júıe boıynsha júzege asyrylady:

• "Eńbek" memlekettik baǵdarlamasyna kiretin 100 suranysqa ıe kásipter tizbesine sáıkes kásipti meńgergen ótinish berýshige – 10 bal;
• Otbasy bolǵan jaǵdaıda – 5 bal, nekede tirkelgen árbir jyly úshin – 2 bal;
• 1 bala bolǵan jaǵdaıda – 1 bal, árbir keıingi bala úshin – 2 bal;
• Jeke kásipkerlik qyzmetti júzege asyrǵan kezde keminde 1 jyl – 5 bal, árbir jyl úshin – 1 bal;
• Ótinish berýshiniń túrli qyzmet salalarynda jeke jetistikteri bolǵan jaǵdaıda - 2 bal;
• Búdjettik uıymdardaǵy eńbek qyzmeti úshin (memlekettik mekemelerde men memlekettik kásiporyndarda) – 5 bal, ótiliniń árbir jyly úshin – 1 bal;
• Ekinshi deńgeıli bankterdiń jınaq shottaryndaǵy (depozıtterindegi) jınaqtardyń árbir jyly úshin – 2 bal.

Bal teń bolǵan jaǵdaıda ótinishti buryn bergen úmitkerler basymdyqqa ıe bolady. Jaldamaly páter berý týraly sheshim shyǵarylǵannan keıin 15 kúnniń ishinde ótinish berýshi men ýákiletti organ arasynda turǵyn úıdi jaldaý sharty jasalady. Baspana 5 jylǵa beriledi.