QR Qorǵanys mınıstri Nurlan Ermekbaev Arystaǵy aptalyq is-sapary barysynda 24 maýsym 2019 jyly Arys qalasynda áskerı boryshyn óteýde qaza bolǵan áskerı qyzmetshilerdiń otbasylaryna memlekettik nagradalar tabystady dep habarlaıdy Qamshy.kz aqparat agenttigi QR Qorǵanys mınıstrliginiń bapsasóz qyzmetine silteme jasap. 

QR Prezıdenti - QK Joǵarǵy Bas qolbasshysynyń 2019 jylǵy 7 tamyzdaǵy "Memlekettik nagradalarmen marapattaý" týraly jarlyǵy boıynsha áskerı boryshyn óteý barysynda kórsetken erligi men qaısarlyǵy úshin aǵa serjant Baýyrjan Álimbekov pen serjant Ábdiqul Ahmetov II dárejeli "Aıbyn" ordenderimen marapattaldy.

Áskerı qyzmetshiler oq-dári qoımasynda órtti sóndirýge qatysyp, áskerı boryshtaryn adal atqardy. Ábdiqul men Baýyrjan bir áskerı bólimde qyzmet etti, jaýapkershilikteri mol ári yntaly boldy, talap etilgen jumysty oryndaýǵa árdaıym asa jaýapkershilikpen qarady.

Qyzmettesteri olardyń árqaısysy óziniń qyzmettik mindetterine saı keletin kásipqoılyǵyn, sondaı-aq ujymmen qarym-qatynas ornatýdaǵy ashyqtyǵyn jáne qarapaıymdylyǵyn esterine aldy.

Qaza bolǵan áskerı qyzmetshilerge bir mınýt únsizdikpen qurmet kórsetti. Arys áskerı bóliminiń jeke quramy áskerı joldastaryn eske alý úshin saltanatty marsh júrip ótti.