2000 jyldan astam tarıhy bar Taraz qalasy túrli aıtýly oqıǵalardyń qart shejireshisi. Munda álem tarıhyna belgili adamdardyń izi qalǵan. Olardyń arasynda tanymal óner juldyzdarynyń da bir shoǵyryn keziktirýge bolady. 1975 jyly sol kezdegi Jambyl qalasyna jumys saparymen kelgen SSSR Halyq ártisi Iýrıı Nıkýlın men SSSR-dyń eńbek sińirgen ártisi Lúdmıla Gýrchenko munda «Soǵyssyz ótken jıyrma kún» fılminiń keı epızodtaryn túsirdi, dep jazady Qamshy.kz aqparat agenttigi. 

Belgili orys jazýshysy Konstantın Sımonovtyń senarıi boıynsha túsirilgen «Soǵyssyz ótken jıyrma kún» fılmi onyń sońǵy týyndylarynyń biri bolyp tabylady. Al fılmge Alekseı German bas rejıserlik etken. Aıtpaqshy túsirilim kezinde kınokartınanyń bas keıipkerleri ataqty Iýrıı Nıkýlın men Lúdmıla Gýrchenko sol kezdegi Jambyl qalasyndaǵy eń iri Shoqan Ýalıhanov atyndaǵy kınoteatrda jambyldyqtarmen júzdesken. Kezdesý barysynda ártister jańa fılmniń túsirilý barysy jáne jáne onyń keıipkerleri týraly áńgime órbitken.

Fılm Uly Otan soǵysynyń qyzǵan shaǵynda 20 kúndik demalys alyp elge oralǵan áskerı jýrnalıs, jazýshy Vasılıı Lopatınniń bastan keshken oqıǵasymen órbıdi. Osy demalysta jaýynger óziniń erlikpen qaza tapqan qarýlasynyń Tashkent qalasynda turatyn týystaryna jolyǵyp, zattaryn óz qolymen tabystaýdy jón dep sanaıdy. Osynda jer aýdarylǵan óz áıelimen de jolyǵyp, óz avtorlyǵymen túsirilip jatqan fılmniń barysymen tanysqan maıor eli úshin, úmitti kózben maıdannan ákesin kútken búldirshinderdiń, súıip qosylǵan jaryn kútken áıelderdiń kózine qarap maıdan sapyn tolyqtyrý azamattyq boryshy ekenin túsinedi. Fılm Uly Otan soǵysynyń eń bir sheshýshi kezeńindegi eldiń jaǵdaıyn anyq sýretteıdi. Ásirese «Bári de maıdan úshin» dep jan talasqan halyqtyń áreketi elde demalyp jatqan ofıserge úlken oı salady. Sondaı-aq maıdanǵa ketken erlerinen qara qaǵaz kelse de úmit úzbegen keńes áıelderiniń qaısarlyǵy men tabandylyǵyna tánti bolady.

Osynysymen fılm 1977 jyly Fransıadaǵy jyl saıynǵy Jorja Sadýlá atyndaǵy syılyqqa ıe boldy. Al 1987 jyly bul kınokartına Rotterdamdaǵy halyqaralyq kınofestıvalde synshylardyń oń baǵasyna ıe bolyp, arnaıy taǵaıyndalǵan syılyqqa qol jetkizdi.