Tarazdyq kásipkerler «Qazaqstan Respýblıkasyndaǵy Til týraly» Zańyn jetik biledi. Atalǵan zańdaǵy 19,21 baptarynyń saqtalýy til salasy mamandarynyń turaqty baqylaýynda, dep jazady Qamshy.kz aqparattyq agenttigi.

Jalpy oblys ortalyǵyndaǵy saýda oryndarynyń, dúkender men ózge de kásiptik nysandardaǵy jarnama mátiniń saýattylyǵy sala mamandarynyń turaqty baqylaýynda. Bul maqsatta Taraz qalasynda reıdtik sharalar jıi ótkizilip turady. Sonyń esebinen tarazdyq kásipkerler «Qazaqstan Respýblıkasyndaǵy Til týraly» Zań talaptaryna jetik. Bul zańnyń 19, 21-baptary memlekettik emes uıymdardyń jumysynda memlekettik til eń birinshi kezekte, al basqa tilder qajet bolǵan jaǵdaıda ǵana qoldanylatyndyǵy taıǵa tańba basqandaı etip jazylýy kerek. Atalǵan zańdylyqtyń oryndalýyn zerdeleý maqsatynda oblys ortalyǵyndaǵy birqatar kásipkerlik nysandardy súzip shyqqan til mamandary jambyldyq kásip ıeleriniń jarnama tilindegi saýattylyq deńgeıi joǵary ekenin aıtady.

– 2019 jyldyń basynda Jambyl oblysy ákiminiń qatysýymen ótken keńeste aǵymdaǵy jyl sońyna deıin 2019 jyly Taraz qalasyndaǵy meıramhana, qonaq úı, saýda úıleri men sán salondarynyń kórneki aqparattaryndaǵy memlekettik tildiń paıdalanylý dárejesin 100 paıyzǵa jetkizý týraly tapsyrma berildi. Sondyqtan oblys ákimdiginiń tilderdi damytý basqarma men oblystyq ákimdiktiń bekitken kelisimine sáıkes kórneki aqparattyń paıdalanýyn baqylaýdyń óńirlerdegi qamtý dárejesi 100 paıyzǵa jetýi kerek, – deıdi oblys ákimdigi tilderdi damytý basqarmasynyń basshysy mindetin atqarýshy Nábıra Súımanova.

Jarnama saýdadaǵy eń utymdy marketıńtik ádis bolǵanymen ony jasaýdyń da óz zańdylyqtary bar. Jáne QR «Jarnama týraly» Zańy saýatsyz jarnamaǵa jol bermeı jáne olarǵa tyıym salýdy maqsat etedi. Sáıkesinshe durys jarnama áýeli memlekettik tilde jazylýy kerek jáne kásipkerdiń qalaýynsha bul jazýdyń birneshe tildegi nusqasy bolýy múmkin. Al bul zań talaptaryn kózge ilmegen kásipkerlerge syrtqy jarnamadaǵy qatelerge qatysty eskertý hat túrinde joldanady. Sondaı-aq syrtqy jarnamaǵa latyn qarpin qoldanýǵa da bolady. Tek mátinniń barynsha saýatty bolǵany abzal. Qajet jaǵdaıda kásipker bul mátinderdi til salasyna jetik mamnadarǵa teksertkeni durys.

Aıta ketetin taǵy bir jaıt Taraz qalasynda jarnamalyq mátinderdiń saýatty jazylýyna, ornalasýyna aqysyz konsýltasıalyq kómek kórsetetin «Jedel jeli» qyzmeti de uıymdastyrylǵan.