Qala kúnin merekeleý aıasynda Baqytjan Saǵyntaev 14-20 qyrkúıek aralyǵynda ótetin II Halyqaralyq Almaty Film Festival kınofestıvaliniń ashylý rásimine qatysty. Festıváldiń urany – "Mádenıetterdi jaqyndastyrý", dep habarlaıdy ákimdiktiń baspasóz qyzmeti.

Negizgi konkýrsqa 2019 jylǵy eki jáne odan da kóp eldiń ónimderi bolyp tabylatyn 12 kınokartına tústi. Konkýrsqa kópjyldyq seriktestik qarym-qatynas qalyptasqan jáne halyqaralyq kınofestıvalderde usynylǵan elderdiń ko-ónimderiniń fılmderi, sondaı-aq sırek ko-ónimderdiń fılmderi endi. Festıváldi ashqan qala ákimi 10-nan astam elden kelgen, atap aıtqanda, Reseı, Qyrǵyzstan, Ózbekstan, Iran, AQSH, Germanıa, Ulybrıtanıa, Fransıa, Nıderlandy, Qytaı, Úndistan, Ońtústik Koreıa, Italıa, Ázirbaıjan, Bolgarıa, Bangladesh, Portýgalıa, Sıngapýr, Palestına, Argentına qonaqtaryna iltıpat bildirdi.

– Festıváldiń ótip jatqanyna eki-aq jyl boldy. Biraq ol álemdik kınojobalar kúntizbesinde laıyqty oryn ala bildi. Bul – Aqan Sataev sekildi kınoǵa ǵashyq jandardyń eren eńbegi. Osyndaı entýzıastardyń arqasynda festıvál qala kórkiniń bir bólshegine aınaldy, – dedi B. Saǵyntaev.

Megapolıs basshysynyń aıtýynsha, Almaty – janǵa jylý syılaıtyn jaıly ári kreatıvti qala. Al onyń turǵyndary kıno ónerin baǵalaı alady jáne túsinedi. Mundaı sharalar elimizdiń mádenı astanasy bolyp tabylatyn Almatynyń jetistigin eseleı túsetini anyq.

Festıválde IýNESKO-men birlesken "Kınodaǵy áıelder", "Ecfa" balalar fılmderiniń eýropalyq qaýymdastyǵymen birlesken "Otbasylyq kıno" baǵdarlamasy, "Jarqyn debútter" baǵdarlamasy jáne "Ushqyn" stýdenttik kınofestıvali jeńimpazdarynyń baǵdarlamasy sıaqty konkýrstan tys baǵdarlamalar usynylady. "Erekshe oqıǵa" baǵdarlamasy aıasynda "ALMATY FILM FESTIVAL" Halyqaralyq kınofestıvaliniń ataqty álemdik qonaqtarynyń jańa jáne retrospektıvti fılmderi, sondaı-aq biregeı gala-premerler kórsetiledi. Jabylý rásimi kezinde 5 negizgi nomınasıa boıynsha marapattaý ótedi:

• Kınofestıval Gran-prıi;

• Úzdik rejıser;

• Úzdik akter;

• Úzdik aktrısa;

• Qazylar alqasynyń arnaıy júldesi;

• IýNESKO-nyń arnaıy syılyǵy.