Almatyda QR Premer-Mınıstriniń orynbasary Berdibek Saparbaev belsendi jastarmen jáne volonterlarmen kezdesti, dep jazady Qamshy.kz aqparat agenttigi QazAqparat tilshisiniń deregin negizge ala otyryp. 

«Qazaqstannyń damýyna úles qosý úshin jastar sapaly bilim men tárbıe alýy kerek. Barlyǵy sizderge baılanysty. Sizderge sport jáne mádenı nysandar qoljetimdi bolýy úshin barlyq jaǵdaı jasalady», - dedi Saparbaev.

QR Aqparat jáne qoǵamdyq damý vıse-mınıstri Danıar Esın:

- Búgingi tańda jastarǵa arnalǵan kóptegen memlekettik baǵdarlamalar bar. 2017 jyly Qazaqstan 183 eldiń jastaryn damytýdyń halyqaralyq reıtıńinde 61-shi oryndy ıelendi. 2019 jyl Jastar jyly dep jarıalandy. Mınıstrlik, Úkimet jastardy áleýmettendirýge baǵyttalǵan 89 sharany josparlady. Búgingi kúngi eń úlken jetistik retinde Nur-Sultan, Almaty jáne Shymkent sıaqty úlken qalalarda baspana máselesiniń sheshilýin atap óter edim. Jumys isteıtin 29 jasqa deıingi jastarǵa jaldamaly baspana 5 jylǵa beriledi. Bul ýaqyt aralyǵynda olar aqshalaryn jınap, basqa memlekettik baǵdarlamalardy paıdalana alady.

Aısulý Ernıazova eriktilerdiń atynan Berdibek Saparbaevtan elimizdegi barlyq JOO-larda eriktiler úıirmesin ashý, stıpendıa jáne aqyly bólimde bilim alyp jatqan eriktilerge jeńildikter qarastyrý máselesin sheship berýdi ótindi.