Almaty elimizdiń kósh bastaýshysy retinde jylyna 5% ekonomıkalyq ósim berýi tıis. Ótken jyly İSHÓ fızıkalyq kóleminiń ındeksi nebári 2,8% ósti – bul halyq ósiminiń qarqynynan tómen (2,9%).

Mańyzdy mindet – eńbekpen qamtý qurylymynda qaıshylyqtardy joıý, bilim, densaýlyq saqtaý, kásibı jáne ǵylymı-tehnıkalyq is-qımyl, aqparattyq tehnologıa enetin áleýmettik ekonomıka úlesin arttyrý.

«Halyqtyń tabysynyń ósýi turý jáne kóshý shyǵyndarynan artyq bolýy tıis. Úlken qala shyǵyndardy azaıtýdyń aýqymdy yqpalyn usyna alady. Munyń máni belsendilik pen yntymaqtastyq», – dep atap ótti B. Saǵyntaev.

Ol qala ekonomıkasyn ósirýdiń perspektıvaly «núktelerin» atady. Olar: logıstıka, qurylys, qarjy men saqtandyrý, smart ındýstrıa, sán ındýstrıasy, óner, kóńil kóterý jáne demalý, týrısik ındýstrıa jáne jyljymaıtyn múlik operasıalary.

Almatyda tehnologıada, densaýlyq saqtaýda, halyqaralyq bızneste, menedjmentte, tabıǵı ekojúıelerdi basqarýda, ózge de qalaǵa qajet salalarda kásipkerler, mamandar úshin úzdik Orta Azıalyq áleýmettik lıft bolýy tıis.

«Iaǵnı, Almatyda «Almatylyq arman» («amerıkalyq armanǵa» uqsas) oryndalýy tıis. Almatyda adamı kapıtal óz isiniń bilgirleri arqyly damyp, ár óńirden daryndardy tartyp, qala turǵyndary arasynda básekege qabilettilikti arttyrý qajet. Sonda ǵana ınvestısıalar, kompetensıalar men ınfraqurylym bizdiń qalamyzdy damytýdyń shynaıy vektoryna aınalady», –  dedi B. Saǵyntaev.

Almatylyqtardyń ómir deńgeıiniń sapasyn arttyrý úshin keshendi máselelerdi sheshý qajet. Olar – ekologıa jáne qoǵamdyq qaýipsizdik, sapaly bilimniń qoljetimdiligi, densaýlyq saqtaý, áleýmettik servıs, aýqymdy turǵyn úı qurylysy, qalanyń ınfraqurylym bazasyn modernızasıalaý, abattandyrý men jasyldandyrý.

«Eń sońǵysy, Almatynyń áleýmettik-ekonomıkalyq damýynda «Ortalyq – shet» jelisinde bazalyq aıyrmashylyqty joıý», – dedi B. Saǵyntaev.

Áleýmettik jaǵdaıda «eki Almaty» qalyptasýda. Birinshisi – jetilgen, jaıly jáne qolaıly ortalyq bólik, ekinshisi – artta qalǵan jetilmegen shet aımaq.

«Meniń pozısıam mynadaı: megapolıstiń barlyq aýdandarynda turǵylyqty jerlerine qaramastan, almatylyqtardyń ómir súrýi úshin joǵary standartty qamtamasyz etý. Men qalamyzdyń «Shetsiz qala» bolýyn jaqtaımyn. Zamanaýı qalalar ortalyqtandyrylǵan, ár aýdannyń óz tartymdylyǵy jáne ósý draıveri bolady. İri mega-qalalarda keri prosester júredi, ıaǵnı adamdar qala mańyna qonystana bastaıdy. Óıtkeni olarda ómir súrý deńgeıi joǵary. Demek, qala ınfraqurylymyn damytýda aımaqtyq pen jergilikti ortalyqtardyń damýy eskerilýi tıis», – dedi B. Saǵyntaev.

B. Saǵyntaev «Shetsiz qala» qaǵıdasy boıynsha megapolısti damytýdyń jańa saıasaty bastalǵanyn habarlady.