BUU sekretarıatynyń barlyq qyzmetshisin as-sýmen qamtamasyz etýshi shef-aspaz Den Lopes jyl saıyn qyrkúıekte Bas Assambleıanyń sesıasyna qatysýǵa keletin memleket basshylary men úkimet múshelerine túski as daıyndaý qalaı júretinimen bólisti, dep jazady Qamshy.kz aqparat agenttigi un.org saıtyndaǵy derekti negizge alyp.
Den Lopestiń aıtýynsha, bir lanchty ázirleýdiń ózi onyń kúndelikti jumysynan kóp kúshti qajet etedi eken.
"170-190 memlekettiń basshylaryn tamaqtandyrǵannan 4 myń adamǵa qyzmet etken anaǵurlym jeńilirek shyǵar. Óıtkeni ádette mundaı qatań qaýipsizdik júıesi esh jerde joq" – deıdi ol.
Aspaz protokol qyzmetiniń nusqaýlyǵyn saqtap qana túrli kýlınarlyq dástúrlerdi ustanatyn memleket basshylarynyń kóńilinen shyǵýǵa bolatynyn aıtady.
"Meniń mindetim – tiskebasarlar, negizgi taǵam men desertterdiń birneshe túrin ázirleý. Protokol qyzmetkerleri sharap pen taǵamdardyń dámin tatyp, lanchqa ne usyný kerektigin sheshedi. Mundaǵy prezıdentter negizigen klasıkalyq fransýz asqanasyn qup kóredi. Birde biz veal en papillote, chicken mousseline, fýa-gra jasaǵanymyz bar. Sondaı-aq memleket basshylary qoı, buzaý etin, omyrtqanyń kesek etin asa unatady, – deıdi aspaz.
Degýstasıa keıde tórt saǵatqa deıin sozylatyn kezder bolady eken. Arasynda talǵampaz jandar úshin dıetalyq taǵamdar jasaýǵa da týra keledi. Balyqtan jasalǵan, etsiz tamaq suraıtyndar da az emes kórinedi.
Túrli ult ókiliniń kóńilin tabý úshin aspazdarǵa sol eldiń asqanasyn bilý asa mańyzdy. Den Lopes Italıa, Fransıa, Belgıa, Qytaı jáne taǵy basqa kóptegen elde bolǵan. BUU qabyrǵasynda da ár eldiń kýlınarlyq dástúrlerin úırenýge múmkindik mol. Munda túrli elderdiń úkimeti ulttyq taǵamdar aptalyǵyn ótkizip turady.
Qyrkúıektegi prezıdenttik tústikterge ázirlik qańtar aıynan bastalady. Jańa mázir jasalyp, maýsymda taǵamdardyń tizimi túsiledi. Shilde sońyna taman sońǵy sheshim qabyldanady. Tamaqtardy eki kún buryn jasap bastaıdy. Azyq-túlik tıegen júk kólikteri tek tańǵy tórt pen alty aralyǵynda ǵana kirgiziledi.
Joǵary deńgeıdegi túski astardy uıymdastyryp júrgenine 20 jyl bolǵan Fernando Barkın Bas Assambleıanyń sesıasy tutas jyldaǵy eń mańyzdy ári kóp qobaljytatyn sát ekenin aıtady. BUU ǵımaratynda túnegen kezderi de az bolmapty. Ondaı shaqtarda Fernando jýynyp-shaıynyp, kofe ishý úshin úıine barýǵa zorǵa ýaqyt tabady.
Qaýipsizdik sharalary jaǵynan AQSH prezıdentiniń kúzeti eń asa qatal bolyp keledi.
Qyzmet kórsetýshi komanda múshesi Mohamed Mahar qyzmet etken prezıdenteriniń sanynan jańylyp qalǵanyn aıtady. Ol úlken Býshtan bastap, Trampqa deıingi prezıdentterdiń bárinde osy istiń basy-qasynda júrgen. "Klıntonnyń Qytaı basshysy men BUU Bas hatshysymen ázildesip otyratyny esimde qalypty. Áńgimege arasynda biz de qosylatynbyz" dep eske alady ol.
Mohamedtiń basty qyzmeti – daıashylar jumysyn uıymdastyrý, tamaqtardyń ý-shýsyz ákelinýin, qurmetti qonaqtarǵa sharap pen tiskebasarlardyń ýaqytyly usynylýyn qamtamasyz etý.
Nú-Iorkte ótip jatqan BUU Bas Assambleıasynyń 74 sesıasyna bıyl da 100-den astam memleket basshysy qatysyp jatyr. Solardyń arasynda Qazaqstan prezıdenti Qasym-Jomart Toqaev ta bar.
Pikir qaldyrý