«Nur Otan» partıasy jalǵan aqparat taratqany úshin S.Zakırov, M.Turymbetov jáne A.Iláshev esimdi azamattardyń ústinen sotqa talap aryz berdi dep jazady Qamshy.kz aqparat agenttigi partıanyń baspasóz qyzmetiniń deregin negizge alyp.

Óıtkeni buǵan deıin jaýapkerler partıa qurýǵa kedergi keltirdi degen jeleýmen birneshe ret «Nur Otan» partıasynyń ústinen sotqa shaǵymdandy. Partıaǵa taǵylǵan bul aıyptaý áleýmettik jeliler men BAQ-ta keńinen taraldy.

«Saıası partıalar týraly» Zańnyń 10-babynyń 1-tarmaǵyna sáıkes saıası partıany memlekettik tirkeýdi Qazaqstan Respýblıkasynyń Ádilet mınıstrligi ǵana júzege asyrady. Demek, «Nur Otan» partıasy basqa partıalardy tirkeý isine qatysa almaıdy, onyń ústine, bul másele boıynsha bireýge kedergi keltiretindeı múmkindigi de joq.

Sondyqtan «Nur Otan» partıasy bul áreketti qoǵamdyq birlestiktiń bedeline nuqsan keltirý úshin jasalǵan dep esepteıdi. Soǵan baılanysty «Nur Otan» partıasy Qazaqstan Respýblıkasynyń Azamattyq kodeksiniń 143-babyna sáıkes tıisti talappen Almaty qalasynyń Jetisý aýdandyq sotyna júgindi.