Almatydaǵy № 4 qalalyq aýrýhanasynyń bas dárigeri Qanat Tezekbaev eshqaıda shyqpaý týraly qolhatpen bosatyldy dep habarlaıdy Qamshy.kz aqparat agenttigi

Almaty qalalyq sotynyń qylmystyq ister ister jónindegi sot alqasy buǵan deıin Qanat Tezekbaevqa qatysty tańdalǵan bultartpaý sharasyn alyp tastady.

"Oǵan qatysty eshqaıda shyqpaý jáne tıisti tártip týraly qolhat túrindegi jańa bultartpaý sharasy qabyldandy", - dep túsindirdi Almaty qalalyq sotynyń baspasóz qyzmetinen.

Sondaı-aq, bul sońǵy sheshim jáne shaǵym túsirilmeıtini habarlanǵan.

Eske salsaq, jýyrda Almatyda №4 qalalyq klınıkalyq aýrýhananyń bas dárigeri Qanat Tezekbaevtyń ustalǵany belgili bolyp, №2 mamandandyrylǵan aýdanaralyq tergeý soty eki aıǵa qamaýǵa alý túrindegi bultartpaý sharasyn tańdaǵan. Dárigerge Qylmystyq kodekstiń 317-baby, 3-bóligi "Medısınalyq nemese farmasevtıkalyq qyzmetkerdiń kásibı mindetterin tıisti deńgeıde oryndamaýy" boıynsha aıyp taǵylǵan bolatyn. 

Tezekbaevtyń bas dáriger qyzmetinen ýaqytsha shettetilgeni habarlandy.

Sondaı-aq, sot sanksıasymen №4 qalalyq klınıkalyq aýrýhanasynyń anestezıology Asqar Tuńǵyshbaev ta eki aıǵa qamaýǵa alyndy. Ol da Qylmystyq kodekstiń 317-baby 3-tarmaǵy boıynsha aıyptalyp otyr.

Eger kinási dáleldense, úsh jylǵa deıin belgili bir laýazymdardy atqarý nemese belgili bir qyzmetpen aınalysý quqyǵynan aıyrylyp, bes jylǵa deıin sottalýy múmkin. 

Bul oqıǵaǵa baılanysty memleket basshysy Qasym-Jomart Toqaev "Germanıa aýrýhanasynda jasalǵan otadan soń qaıtys bolǵan naýqastyń ólimin Zańǵa sáıkes tekserýdi tapsyrdym. Bul másele Prezıdent Ákimshiligi, Densaýlyq saqtaý mınıstrligi, Almaty q. ákiminiń baqylaýynda" dep tvıtterde jazba qaldyrǵan edi.

Al buǵan deıin jelide Tezekbaevtyń ustalýy Nursultan Kúdebaevtyń ólimimen baılanysty bolýy múmkin ekeni jazylǵan hat taraǵan edi. Almaty polısıa departamentiniń basshysy Serik Kúdebaevtyń uly Nursultan Kúdebaev bıyl tamyzdyń basynda Almaty oblysynda kvadrosıklmen jol apatyna túsken bolatyn. 27 tamyz kúni jas jigit Germanıadaǵy emhanalardyń birinde kóz jumdy.