Talas aýdanynda turǵyndardyń turmystyq tabysyn jaqsartý maqsatynda «Úı irgesindegi jerlerdi tıimdi paıdalaný», «Mal sharýashylyǵyn damytý», «Aýyl syrtyndaǵy jerlerdiń tıimdiligin arttyrý», «Kooperatıvter qurý» jáne «Shaǵyn kásipkerlik jobalardy qoldaý» jobalary júzege asýda. Halyqtyń ómir sapasyn jaqsartýǵa baǵyttalǵan bul 5 baǵyt boıynsha aýdanda 4 mlrd. 415 mln. teńge quraıtyn 1647 joba ázirlengen dep jazady Qamshy.kz aqparat agenttigi.

– Bıylǵy jylǵa Úsharal aýyldyq okrýgi pılottyq jobaǵa enip, 626 mln. teńgege 261 jobaǵa jeńildetilgen nesıeler alýǵa jumystar atqarylýda.

Jobany júzege asyrý maqsatynda qurylǵan jumys toby tarapynan 17 qyrkúıekke deıin okrýgtegi 232 úıdiń qujattary tekserildi. Olardy túzetýge qatysty tıisti mekemelerdiń mamandary jergilikti jerde jumys júrgizip jatyr.

2019 jylǵy 17 qyrkúıekke «Taraz» áleýmettik-kásipkerlik korporasıasyna barlyǵy 19 qujat toptamasy tapsyryldy. Bul maqsattaǵy jumystar tıisti mekemelerdiń qatysýymen turaqty júrgizilýde.

Budan bólek, kooperatıv qurý, jabdyqtaý boıynsha 227 mıllıon 375 myń 239 teńgege «Talas-2020» aýylsharýashylyq kooperatıvi quryldy, – deıdi aýdan ákimi Dosmahanbet Alıev.

Aýdanda, budan bólek, ınvestısıalardy tartý baǵytynda da birneshe jobalar júzege asyryp jatyr. Atap aıtqanda, quny 3,7 mlrd. teńgeni quraıtyn, qýattylyǵy 9,0 mVt bolatyn jel elektr energıasyn óndirý maqsatynda «Vınd Paýer Sıtı» jáne «Vınd Elektrısıtı» JSHS-niń qurylys-montaj jumystary júrgizilýde. «Amangeldi GAZ» JSHS-niń «Qaıraqty» ken ornynda qosymsha uńǵymalar iske qosyldy.

– Sondaı-aq, «Ýrban Solar SAS» fransıalyq kompanıasy tarapynan qýattylyǵy 50 MVt kún elektr stansıasyn soǵý maqsatynda 150 gektar jer bólý týraly suranys túsip otyr. Qazirgi tańda jer qarastyrý jumystary júrgizilýde.

«Talas ınvestment kompanı» jaýapkershiligi shekteýli seriktestigi sıanıd-natrıı ónimin jylyna qýattylyǵy 15 myń tonnadan 30 myń tonnaǵa arttyrý maqsatynda qosymsha zaýyttyń qurylysy soǵylatyn bolady. Joba quny 18 mlrd. teńge.

Sonymen qatar, aýdanda 64 tarıhı mádenı eskertkishterimiz bar, aldaǵy ýaqytta osy múmkindikterdi paıdalana otyryp, ishki jáne syrtqy týrızmdi damytý boıynsha jumystar júrgiziletin bolady. Jumystardy iske asyrǵan jaǵdaıda qonaq úı, meıramhanalar jáne ózge de servıstik qyzmet

kórsetýmen aınalysatyn jergilikti kásipkerler jumyspen qamtylady, – deıdi aýdan basshysy.