Qys qyr astynda. Sondyqtan qazir qysqa daıyndyq qarqyndy júrgizilýde. Ásirese jylytý maýsymyna aýyldaǵy aǵaıyn myqtap kirisken. Alaıda adamdar kez-kelgen ádispen úılerin jylytýǵa asyǵatyny sonshalyq, órt qaýipsizdigi erejelerin saqtamaý saldarynan órt shyǵyp jatady dep jazady Qamshy.kz aqparat agenttigi .

Jylytý peshterine baılanysty órtterdiń sebepteri negizinen tútindikte jınalatyn kúıeniń janýynan, qabyrǵalarynyń qatty qyzýy nátıjesinde tútin qubyrlaryndaǵy kirpishterdiń jarylýy bolyp jatady. Al bólmelerdi jylytý úshin elektrli, onyń ishinde qoldan jasalǵan quraldardy qoldaný elektr jelileriniń shamadan tys júktelýine, túıispe batterdiń qatty qyzýyna, artynan symdardyń tutanýyna ákelip soǵady.

Jambyl oblysy Baızaq aýdandyq Tótenshe jaǵdaılar bólimi aǵymdaǵy jyldyń 25 tamyz- 25 qyrkúıek aralyǵynda turǵyn úı sektorynda aılyq ótkizýdi josparlaǵan bolatyn. Endi osy aılyq barysynda turǵyn úı sektoryndaǵy órtter men ýly gazdan ýlaný oqıǵalarynyń aldyn alý jáne jol bermeýdi buqaralyq aqparat quraldary arqyly túsindirý jáne profılaktıkalyq jumystar júrgizýge baǵyttalǵan sharalar júrgizildi. Órt qaýipsizdigi aılyǵyn ótkizý barysynda 3 myńnan astam turǵyn úıdi aralap, eń birinshi karkas-qamysty jáne t.b. úılerge basty nazar aýdaryldy. Barlyǵy 9 myńnan astam turǵynmen áńgimelesý júrgizilip, jadnamalar taratyldy. Jylý berý maýsymy kezinde órt saldarynan adamdardyń qaza bolýynyń aldyn alý úshin 10 myńnan astam azamatqa nusqaýlyq taratyldy. Jylytý peshterin, elektr qondyrǵylaryn paıdalaný kezinde órt qaýipsizdigi erejelerin saqtaý boıynsha 1687 adamnyń qatysýymen 16 jıyn uıymdastyryldy. Budan bólek, oblystyq «Jambyl» telearnasynda, Sarykemer aýylynyń LED dıspleılerinde jáne HQKO fılıaldarynda beınerolıkter kórsetilýde. Júrgizilip jatqan túsindirý jáne profılaktıkalyq jumystar órt qaýipsizdigin aldyn alýǵa, sondaı-aq, óńirdiń turǵyn úı qorynyń órtke qarsy qorǵalýyn kúsheıtýge yqpal etedi dep senemiz.

«Saqtyqta qorlyq joq» deıdi dana qazaq. Sondyqtan jylytý maýsymynda saqtyq sharalaryn da umytpaǵan jón. Ásirese qatty otynmen úılerin jylytatyn turǵyndar balalaryna qyraǵylyq tanytqandary abzal. Sebebi kóptegen órtter dál osy balalardyń qaraýsyz qaldyrǵannan oryn alyp jatady. Dese de beti aýlaq, bıylǵy jylytý maýsymy sátti ótedi dep senemiz.