Qazaqstanda 1 qarashadan bastap mekenjaı anyqtamasynyń joıylatyny belgili. «Azamattarǵa arnalǵan úkimet» memlekettik korporasıa basqarmasynyń tóraǵasy Ásemgúl Baltasheva odan bólek taǵy 28 anyqtamanyń da joıylatynyn jarıalady, dep habarlaıdy Qamshy.kz aqparat agenttigi QazAqparat.

«Elimizde mekenjaıy anyqtamasyn joıý – jumystyń basy ǵana. Biz qazirgi ýaqytta dál osyndaı 28 anyqtamany joıýdy kózdep otyrmyz. Iaǵnı, taǵy 28 anyqtamany alý úshin Halyqqa qyzmet kórsetý ortalyǵyna barýdyń qajeti bolmaı qalady», – dedi Ásemgúl Baltasheva elordada ótip jatqan «Sıfrlyq kúz» sharasynda.

Onyń aıtýynsha, ártúrli sıpattaǵy anyqtamalar men qujattar ómirlik qajettilikterden týyndaıdy.

«Biz sheteldik tájirıbelerdiń kóbin zerttep, qyzmetterdiń sapasy men qoljetimdiligin arttyrý úshin aýqymdy taldaý jumystaryn júrgizdik. Belgili bir qujatty alý úshin mindetti túrde ýaqyt bólip, mekeme aralaýdyń qajettigi joıylyp barady. Memlekettik qyzmetterdi alýdyń proaktıvti túrde alý múmkindigin jolǵa qoıdyq. Proaktıv degenimiz – qyzmettiń óziniń azamattardy izdep tabýy degendi bildiredi. Qaıda baram, ne isteımin dep bas qatyrýdyń keregi joq. Osynaý 28 memlekettik qyzmettiń túrin 17 proaktıvti qyzmetke aýystyryp jatyrmyz. Iaǵnı, 28 qyzmettiń túrin regıstrden alyp tastaımyz», – dedi Ásemgúl Baltasheva.

Eske sala ketsek, İshki ister mınıstrligi Qazaqstanda mekenjaı anyqtamasy joıylatynyn buǵan deıin habarlaǵan bolatyn.