SHQO-da Jańa Ahmerdegi polıgon aımaǵynda áskerı jıyn ótti. Oǵan SHQO-daǵy Óskemen men Ulan aýdanyndaǵy áskerı mindettiler qatysty. Olardyń deni aýmaqtyq qorǵanys rotasynyń jazylýshylary. Áskerı jıynǵa qatysýshylardyń bári kezinde QR Qarýly kúshterinde jedel qyzmet atqarǵanyn atap ótken oryndy.

Taktıkalyq-arnaıy jattyǵý barysynda bólimsheler arasynda jaýyngerlik atys uıymdastyryldy. Aqtyq kezeńge oblys ákiminiń birinshi orynbasary Erlan Aımuqashev, sondaı-aq óńirge qarasty qalalar men aýdandardyń ákimderi qatysty. Nátıjesinde aýmaqtyq bólimsheniń áskerı mindettileri «Vzvod qorǵanysta» bóliminiń barlyq talabyn oryndady.

SHQO-daǵy jumyldyrý basqarmasy men ákimniń áskerı qaýipsizdik jáne qorǵanys jónindegi kómekshisi Ádilet Saqaýovtyń uıymdastyrýymen SHQO-daǵy qorǵanys isteri jónindegi departamentte qalalar men aýdan ákimderine, sondaı-aq aýmaqtyq qorǵanys salasynyń qyzmetkerlerine arnalǵan teorıalyq sabaq ótkizildi. Onda qatysýshylarǵa mobılızasıalanǵan daıyndyq pen aýmaqtyq qorǵanysty qalaı durys júrgizý kerektigi týraly keńinen túsindirildi.

SHQO-daǵy qorǵanys isteri jónindegi departamentiniń basshysy Qaıyrbek Qaırqanov QR Qarýly kúshterinde jedel áskerı qyzmetin óteý syndy basqa da taqyryptar boıynsha dáris oqydy.

Taktıkalyq-arnaıy jattyǵýynyń ótýine QR Ulttyq gvardıasy, SHQO tótenshe jaǵdaılar departamenti men densaýlyq saqtaý basqarmasy qoldaý kórsetti. Atalmysh qurylymdar mına-jarylǵysh bógetterdi tabý, jaraly jaýyngerdi urys alańynan áketý, qoıma mańyndaǵy órtti aýyzdyqtaý jumystaryna jumyldyryldy. Áskerı mindettiler atys jáne taktıkalyq urys sabaqtaryna qatysty. Sonymen qatar jaýyngerlik bilimderi men qarýdy durys ustaý qabiletterin shyńdap qaıtty.

Bul áskerı jıyn bólimshelerdi qorǵanys nysandary men sheteldegi tapsyrmalardy birlesip oryndaýǵa úıretti.

Jıyn QR Qorǵanys mıınıstrliginiń josparyna sáıkes júrgizildi. Sondaı-aq SHQO ákimdiginiń qaýlysyna oraı jergilikti atqarýshy organdarmen jáne 99230 áskerı bólimshesiniń qyzmetkerlerine arnalǵan taktıkalyq-arnaıy jattyǵý ótti. Oǵan aýmaqtyq qorǵanys bólimshesinen kelgen 88 áskerı qyzmetker qatysty.

Aıta keteıik, jattyǵý joǵary kásibı deńgeıde uıymdastyryldy. Jıyn sońynda úzdik nátıje kórsetken áskerı mindettilerge gramotalar tabystaldy.