Qazaqstanda gaýhar qondyrmasy bar "Kóshpendilerdiń ǵıbadat janýarlary - totemderi" monetalar serıasynan "ÚKI" koleksıalyq monetalaryn aınalymǵa shyqty dep habarlaıdy Qamshy.kz aqparat agenttigi Tengrinews.kz saıtyna silteme jasap.

Qazaqstan Respýblıkasynyń Ulttyq Banki 2019 jylǵy 2 qazanda nomınaly 5 000 jáne 500 teńgelik kúmisten, nomınaly 200 jáne 100 teńgelik melhıor qospasynan "Kóshpendilerdiń ǵıbadat janýarlary - totemderi" monetalar serıasynan "ÚKI" koleksıalyq monetalaryn aınalysqa shyǵarady.

"Bul moneta "Kóshpendilerdiń ǵıbadat janýarlary - totemderi" monetalar serıasyn jalǵastyrady. Bul serıadaǵy monetalar dızaıny beınelenetin janýardyń natýralısik jáne trafarettik túrin "saq janýar stıline" alegorıalyq turǵydan úılestirip kórsetýge negizdelgen. Úki kóptegen mádenıette danalyq, bilim, jasyryn múmkindikter men biregeı paıym nyshany bolyp tabylady.

Kóshpendiler úkini qasıetti qus dep eseptegen. Bul nanym úkiniń adamdardy jynnan kúzetýge yqpal etetin, danalyqty pash etetin qus retindegi rólin túsinýge baılanysty", - delingen Ulttyq bank habarlamasynda. 

Nomınaly 5 000 jáne 500 teńgelik "ÚKI" monetalary altyndatý tehnologıasyn qoldana otyryp kúmisten jasalǵan jáne gaýhar qondyrmasy bar. Monetalardyń bet jáne syrt jaqtaryndaǵy beıneler birdeı. Monetalardyń bet jaǵynda (aversinde) ulttyq oıý-órnektiń qorshaýynda Qazaqstan teńge saraıynyń taýar belgisi jáne moneta daıyndalǵan metaldy, onyń synamyn jáne massasyn bildiretin degen jazba beınelengen.

Monetany aınaldyra "QAZAQSTAN RESPÝBLIKASY" jáne "REPUBLIC OF KAZAKHSTAN" degen jazbalar bar. Monetalardyń syrt jaǵynda (reversinde) gaýhar qondyrmasy bar úkiniń basynyń natýralısik jáne trafarettik beınesinen kompozısıa, monetanyń joǵary bóliginde "ÚKI" degen jazba ornalasqan. Monetany aınaldyra dekoratıvtik resimdeý elementteri bar úlken jıek júrgizilgen.

Nomınaly 200 jáne 100 teńgelik "ÚKI" monetalary MN25 sapaly melhıor qospasynan "rroof-like" jáne "brilliant uncirculated" sapasymen daıyndalǵan. "Rroof-like" daıyndaý sapasymen monetada altyndatý tehnologıasy qoldanylǵan. Monetalardyń bet jaǵynda (aversinde) ulttyq oıý-órnektiń qorshaýynda soǵylǵan jyly, nomınaly, Qazaqstan teńge saraıynyń taýar belgisi beınelengen.

Monetany aınaldyra "QAZAQSTAN RESPÝBLIKASY" jáne "REPUBLIC OF KAZAKHSTAN" degen jazbalar bar. Monetalardyń syrt jaǵynda (reversinde) úkiniń basynyń natýralısik jáne trafarettik beınesinen kompozısıa, monetanyń joǵary bóliginde "ÚKI" degen jazba ornalasqan. Monetany aınaldyra dekoratıvtik resimdeý elementteri bar úlken jıek júrgizilgen. Monetalar koleksıalyq quny boıynsha satýǵa arnalǵan.

"Nomınaly 5 000, 500, 200 jáne 100 teńgelik koleksıalyq monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq bank shottaryna esepteý úshin jáne aýdarym jasaý úshin qabyldanýǵa mindetti, Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady Kúmis monetalar kádesyılyq oraýmen shyǵarylady jáne Qazaqstan Respýblıkasy Ulttyq Bankiniń memlekettik, orys jáne aǵylshyn tilderindegi nómirlik sapa sertıfıkatymen jabdyqtalǵan. "Proof-like" daıyndaý sapasy bar melhıor qospasynan daıyndalǵan monetalar kádesyılyq oraýmen shyǵarylady. "Brilliant uncirculated" daıyndaý sapasy bar melhıor qospasynan daıyndalǵan monetalar arnaıy polıgrafıalyq oraýmen shyǵarylady", - delingen Ulttyq bank habarlamasynda. 

Koleksıalyq monetalardy "Qazaqstan Respýblıkasy Ulttyq Bankiniń Qazaqstan teńge saraıy" sharýashylyq júrgizý quqyǵyndaǵy respýblıkalyq memlekettik kásiporny daıyndaǵan. Koleksıalyq monetalardy Qazaqstan Respýblıkasy Ulttyq Bankiniń barlyq aýmaqtyq fılıaldarynda, sondaı-aq www.nationalbank.kz saıtyndaǵy Internet - dúken arqyly satyp alýǵa bolady.