18 qyrkúıekte Qoǵamdyq damý basqarmasynyń tapsyrysymen Almaty qalasyndaǵy Ortalyqtandyrylǵan kitaphanalar júıesi Saparǵalı Begalın atyndaǵy kitaphanasy «Óner ádebıetteri» jáne «Adyrna» ulttyq-etnografıalyq birlestigimen birge uıymdastyrǵan, ásem Almatymyzdyń týǵan kúnine arnalǵan «Almaty birlik pen kelisim ordasy» atty dóńgelek ústel ótti.

İs-sharaǵa fılosofıa ǵylymdarynyń doktory Murat Sábıt, Qazaqstandaǵy «Vaınah» sheshen-ıngýsh mádenı ortalǵynyń dırektory Adam Baıpalov, «Ozan» Ázirbaıjan qoǵamdyq qorynyń tóraǵasy Garıb Mámedov jáne Joǵary medısına kollledjiniń stýdentteri men  kitaphanashysy Álıa Saıaqbaıqyzy, İ.Núsipbaev atyndaǵy №4 mektep-ınternattyń 10-11 synyp oqýshylary men ustazdary qatysty.

Almaty elimizdegi erekshe qalalardyń biri. Qazaqstan tarıhy kitap ispetti. Sol kitaptyń kóptegen betteri osy Almaty qalasynda jazyldy deýge bolady. Osy qalada qazaq halqynyń ataqty ul-qyzdary ómir súrdi. Almatyda klasık aqyn-jazýshylar Muhtar Áýezuly, İlıas Jansúgiruly, Sábıt Muqanuly, Márıam Hakimjan, Ǵabıt Músirepuly, Berdibek Soqpaqbaıuly,  óner aspanyna daýysy bulaq sýyndaı syńǵyrlaǵan ánshi Kúlásh Baıseıit, myń buralǵan uly bıshi Shara Jıenqulqyzy, Ábilhan Qasteıuly bastaǵan sýretshilier, Sultan Qojyq, Sháken Aımanuly, Májıt Begalın, Abdolla Qarsaqbaı syndy kınorejısserler, Elýbaı Ómirzaq, Qalıbek Qýanyshbaı, Qanabek Baıseıituly, Sábıra Maıqan, Farıda Shárip, Ánýar Moldabek, Asanáli Áshimuly syndy teatr jáne kıno áleminiń sańlaqtary ómir súrdi.

Álemge belgili jemis Alma atyn ıelengen qalada batyrlar Baýyrjan Momyshuly, Mánshúk Mámetqyzy, Qasym Qaısenuly, Raqymjan Qoshqarbaı taǵy basqalar ǵumyr keshti. Almaty qalasynda Qazaqstan ǵylymynyń damýy bastaldy. Ǵylym Akademıasyn qurǵan ǵalym Qanysh Sátbaıuly, Álkeı Marǵulan, Altyn Adamdy tapqan Beken Nurmaǵambetuly, Kemel Aqyshuly taǵy basqa da ǵalymdar kóptegen ǵylymı jańalyq ashty.

Almatyda Qazaqstannyń eń úzdik joǵary oqý oryndary ornalasqan. Túrli gazet-jýrnaldardyń baspalar ornalasqan.

Almatymen tanysamyn degen kim bolsa da qaladaǵy mádenı keshenderdi aınalyp ótpesi anyq. Qaladaǵy murajaılar men kitaphanalar, Medeý muz aıdyny taǵy basqa da mádenı keshenderadamdardy rýhanı baıytýda áseri mol.

Qalada kóptegen sporttyq jarystar ótip jatady. Árıne Almatynyń baılyǵy eń aldymen qala turǵyndary. Qalada qazaq ulty men qatar basqa da ult ókilderi turady. Qazaq halqy men basqa da ulttar ókilderi tatý-tátti ómir súrip jatqan qala kúnnen kúnge kórkeıýde.

«Almaty birlik pen kelisim ordasy» atty dóńgelek ústeline qatysqan qonaqtar jastarǵa qala tarıhy men jetistikteri týraly kóptegen qyzyqty málimetter aıtty. Qonaqtardyń bári de Almatynyń búgingi gúl qala bolýyna Qazaqstanda turatyn azamattardyń qosqan úlesi zor ekenin  atap ótti.

Shara barysynda stýdentter men mektep oqýshylary qonaqtarǵa kóptegen suraqtar qoıdy. Óz kezeginde kitaphana qyzmetkerleri de pikirlerimen bólisip qonaqtarǵa osy kún este qalsyn dep syı-sıapat tartý etti. 

Berdaly OSPAN