Sportsúıer qaýym bıylǵy qyrkúıek aıy sporttyq jarystarǵa toly bolǵanyn jaqsy biledi. Taıaýda ǵana Jambyl oblysy, Jambyl aýdanynyń ákimi Baqyt Qazanbasovtyń Kýbogyn sarapqa salǵan balǵyn balýandarymyz oblystyq deńgeıde ótken jarysta atoı salsa, halyqaralyq dodalarda da dara shyǵyp júrgen jampozdarymyz az emes. Sonyń biri – jerlesimiz, qarakemerlik 20 jasar Janserik Jumabaı sambo kúresinen Úndistanda ótken Azıa chempıonatynda jeńimpaz atanyp, abyroıymyzdy asqaqtatty, dep jazady Qamshy.kz aqparat agenttigi. 

Baıraqty básekede elimizdiń kók týyn kókke kóterip, Ánuranymyzdy shyrqatqan Janserikpen jarystan keıin tildesýdiń sáti tústi.

– Mundaı aıtýly jarysqa alǵash ret qatysyp otyrmyn. Qarsylastarym osal emes edi. Bári de chempıondyqtan dámeli. Árıne, jarysqa eshkim jeńilemin dep kelmeıdi. Sondyqtan mende Azıa chempıonatyna úlken daıyndyqpen keldim. 100 kelide ozkilemge alǵash qyrǵyz balýanymen shyqsam, ekinshi qarsylasym Aýǵan eliniń alyp jigiti boldy. Úshinshi qarsylasym Úndi eliniń úmiti. Bárin de belgilengen ýaqyttan buryn jeńdim. Aqtyq básekeni ózbektiń balýanymen beldesip, odan aılamdy asyrdym. Meniń bıikten kórinýim birinshi Allanyń, ekinshi bapkerlerim men jankúıerlerimniń arqasy.

Meniń túsingenim, bap pen baq qatar shapsa, baǵyndyra almaıtyn bıigiń bolmaıdy eken. Barsha qazaqstandyqtarǵa qoldaýlary úshin aıtar alǵysym sheksiz. Meniń kúrespen aınalysýyma shekteý qoımaǵan ákem Janbolat pen anam Gúlnurǵa, Tóle bı atyndaǵy orta mektep muǵalimderine, synyp jetekshime raqmetten basqa aıtarym joq.

Beldesýdi munymen shekteý oıymda joq. Aldaǵy qazan aıynyń 10-14 kúnderi Ózbekstanda sambodan jastar arasynda ótetin álem chempıonatyna qatysyp, baǵymdy synap kórmekpin. Bul dodada da júzden júırik shyǵýǵa barymdy salamyn, – deıdi tolaǵaıymyz.

Aıta keteıik Janserik Qarakemer aýylynyń týmasy bolǵanymen, qazir Almaty qalasyndaǵy Qazaqtyń týrızm jáne sport akademıasynyń 4-kýrs stýdenti. Sondyqtan da Almaty oblysynyń atynan óner kórsetýde. Alaıda qaı óńirdiń atynan shyqsa da eń bastysy elimizdiń atyn álemdik arenada tanynyp júrgen batyr ulymyz.

Janseriktiń álem chempıonatynda da el namysyn abyroımen qorǵaıtynyna bek senimdimiz.

Balýanǵa oń-soly bir ekenin dáleldeı bilgen Janserik sambomen qatar qazaq kúresi, dzúdony da qatar alyp júr. Ol qazaq kúresinen de, dzúdodan da Qazaqstan Respýblıkasynyń eki dúrkin chempıony.

Aǵaǵa qarap ini óser desek, Janseriktiń inisi Jantóre de qazaq kúresinen el chempıony. 9 jastaǵy Qasymhan, Esimhan esimdi inileri de kúrespen aınalysyp júrgen balǵyndar.

Endeshe balýandar otbasynyń árdaıym aıy ońynan týsyn dep tileıik. Jáne aldaǵy álem chempıonatynda Janseriktiń jeńisti joryǵy jalǵasa tússin.